Tanba, programa Governu iha povu nia le'et ka ‘Naroman ba Suku’ hanesan meius atu ko'alia no rona difikuldade, preokupasaun no problema ne’ebé komunidade sira hasoru.

Ministru, Francisco Martins, hatete, programa VIII governu nian haree liu ba ema, ema mak sai sentru ba dezenvolvimentu Nasionál no esforsu atu komunidade hotu bele sente dezenvolvimentu.

Nia argumenta, VIII governu mós esforsu nafatin atu hadi’a komunidade nia futuru liu husi área edukasaun, saúde no área sira seluk.

Nia dehan, tuir lolos membru Governu barak mai atu rona povu nia preokupasaun, maibé iha asuntu seluk, entaun sira labele mai, maibé preokupasaun hotu ne'ebé hato'o sei tutan ba ministériu relevante.

Ministru mós promete sei harii sentru informasaun iha Suku Uai-Laha atu joven sira bele aprende oinsá bele fahe informasaun ne'ebé los bá komunidade sira.

Nune’e, Xefe Suku Uai-Laha, Rafael Guterres, hato'o agradese ba MAPKOMS ho nia ekipa, tanba bele mai rona komunidade nia lian.

Dialogu ba programa Governu iha povu nia le'et ka ''Naroman ba Suku'' ne’e, hetan partisipasaun husi reprezentante husi parte Saúde , Segundu komandante PNTL Munisípiu Baukau, Komandante Polísia Eskuarda Venilale, Administradór Postu Administrativu Venilale no komunidade sira iha Suku Uai-Laha. (*)