"Ha’u lori Sekretária Estadu Cooperativas nia naran hato'o parabéns ba ita bo'ot sira, tanba bele realiza ona asembleia jeral ida ne'e, hein katak kooperativa HKO la'os de’it ba Timór, maibé ba Asian tomak", haktuir komunikadu ne'ebé www.tempotimor.com asesu iha pájina ofisiál SEKOOP, tersa (06/12).
Nune'e, husu ba dirijente no membru kooperativa HKO atu iha kriatividade hodi diversifika produtu kafé di’ak liu tán.
"Ita dirijente no membru kooperativa sira tenke iha hanoin atu diversifika produtu kafé sai produtu ida maka iha valór ekonómiko, ne'e katak ita halo mina morin husi kafé tau logo kooperativa nian, ita halo doce husi kafé no imi bele loke sentru kafetária, ita tenke kriativu no dezenvolve hahú husi ida-idak", haktuir komunikadu.
SEKOOP mós husu dirijente kooperativa HKO sira atu eduka produtor kafé hodi kuidadu nafatin kafé ninia qualidade.
"Ha’u husu ba ita boot sira, sai dirijente la'os de’it halo negósiu hola kafé atu exporta, maibé eduka ita nia agrikultor sira atu hatene halo jestaun ba kafé katak, asegura nafatin kafé ninia kualidade orgâniku hodi kompete iha merkadu internasionál sira, tanba atu kompete ho nasaun sira seluk, iha Asian ho kuantidade café ne'e ita nian lato'o", afirma nia.
Prezidente Kooperativa HKO, Manuel Maia, hatete, iha vida kooperativismu, assembleia jerál mak orgaun aas liu hodi trasa planu ba futuru.
"Ami kria assembleia jeral ida ne'e, tanba iha vida kooperativa nia mak aas liu, hodi membru sira bele hato'o ninia difikuldade, opiniaun inklui halo planu no programa ba membru sira iha baze", dehan nia.
Entretantu membru kooperativa sira ne'ebé partisipa iha asembleia jeral ne'e, hamutuk ema na’in 40-resin, ne’ebé mai husi Munisípiu Ermera, Likisa no Aileu. (*)