"Ko'alia mós assuntu rua seluk importante tebes, ida mak haree obra ida ne'e, tanba obra ida ne'e demora oituan, entaun ha'u hakarak hatene, ida seluk mak ko'alia kona ba Tribunal Supremu ne'ebé komesa ona prepara dezeñu", dehan Taur iha edifisiu Tribunal Rekursu, Kaikoli, Sesta (13/01).
Espera tinan 2023 ne'e, konstrusaun ba edifisiu Tribunal Rekursu bele hotu ona, iha difikuldades balun mas tékniku sira haree no serbisu, no garante tinan ne'e obra sei hotu.
Nune’e, Primeiru Ministru kompromete hakarak observa direita fali ba prosesu konstrusaun edifisiu Tribunal Rekursu iha tempu badak.
Alende ne'e, Prezidente Tribunal Rekursu (TR), Deolindo Dos Santos informa, vizita Primeiru Ministru nian ne’e ko’alia kona-ba obra ba edifisiu Tribunal Rekursu ne’ebe paradu.
"Nia mai atu hatene informasaun kona-ba obra ne’e, entaun ha’u dehan ba sua exelensia Primeiru Ministru katak, situasaun real mak atraza fulan hira ona, depois ita tenta fo solusaun no agora obra la’o fali ona, maibé sei lentu los, entaun ita tenta atu fo solusaun ho forma ne’ebé lais", nia dehan
Razaun konstrusaun demora, tanba situasaun real no mundial ne'ebé kompaña hasoru no mós kontrola ne'ebé Governu halo ba kontraktor no fiskalizasaun rigoruzo tebes.
Konstrusaun Edifisiu Tribunal Rekursu ne'e, lansa fatuk dahuluk iha fulan-novembru tinan 2020, ne'ebé hetan supervizaun husi konsultor Kompaña Dacrea in Asosiation with AEC no kontraktór husi Kompaña Xina Shadong International Economic and Tecnichal Cooperation Group R.P ho orsamentu valor US$10.990.769,35 ne'ebé tuir akordu durasaun tempu ba konstrusaun durante tinan rua, husi tinan 2020 to’o 2021. (*)