Tuir informasaun ne’ebé www.tempotimor.com, asesu iha portalgovernu, kinta (31/08/2023) katak, Timor-Leste iha liña ho pozisaun ne’ebé asume husi ASEAN no Nasaun Unidas, reafirma importánsia hodi apoia esforsu hothotu atu filafali ba orden demokrátika iha Myanmar no hato’o ninia solidariedade ho povu Myanmar, iha tempu hanesan insiste ka husu ba Junta Militár hodi respeita direitu umanu no buka solusaun ida ne’ebé pasifika no konstrutiva ba krize ne’e

Tanba situasaun iha Myanmar sai ona preokupasaun globál husikedas golpe militár iha fulan-fevereiru tinan 2021. Junta Militár ne’e asume podér, hodi anula rezultadu husi eleisoins demokrátikas no hamosu krize umanitária, ekonómika no polítika lubuk ida.

Nune’e, komunidade Internasionál, inklui Timor-Leste, kontinua apela hodi rezolve krize ne’e ho dalan ida ne’ebé pasifika no respeitu ba direitu fundamentál sira povu Myanmar nian.

Portavós Governu Konstitusionál IX nian, Ministru Agio Pereira hatete, Repúblika Demokrátika Timor-Leste nafatin firme ho ninia konviksaun katak liuhusi diálogu de’it no respeitu ba vontade povu nian maka bele alkansa solusaun ida ne’ebé pasifika no dura iha krize Myanmar.

“Ha’u apela ba komunidade internasionál atu hamutuk iha esforsu sira hodi promove restaurasaun orden demokrátika no direitu umanu iha rejiaun ne’e”, afirma Agio. (*)