Iha ambiente diskusaun Orsamentu Jerál Estadu (OJE) tinan fiskál 2020 iha jeneralidade, deputadu Bankada Governu 'raut-malu' tanba osan ne'e.

Deputada Bankada Congresso Nacional Reconstrução Timor-Leste (CNRT), Fernanda Lay, la simu deklarasaun husi deputadu Bankada Partidu Libertasaun Populár (PLP), Francisco Vasconcelos, ne'ebe dehan deputadu sira ezije redusaun osan ba governu maibé osan privativu PN rasik la redús.

Hakfodak no diskorda ho deklarasaun ne'e, Deputada Fernanda Lay, fó sai katak, PN maka halo redusaun uluk antes husu ba governu atu ko'a sira-nia osan.

"Primeiru proposta parlamentu ninian tokon $24.4,  ne'e bazeia ba planu anuál, depois membru Konselu Administrasaun Sekretariadu hatuun ba tokon $19.4. Depois, hatuun tan ba tokon $17.855 no ikus liu, tun hela tokon $16.486", dehan nia, iha Uma Fukun PN, Kinta (16/1).

Deputada Lay ho oin ladun kontente hatete, karik deputadu sira hakarak redús tan bele, tanba dadaun prosesu sei la'o hela atu bele hamenus tan.

"Se hakarak ko'a tan iha debate orsamentu, bele ko'a tan. Ba Ha'u laiha buat ida, maibé hanesan deputadu Fransisco Vasconcelos nia-razaun ne'e Ha'u la konkorda", tenik nia. 

Deklarasaun deputada bankada governu ne'ebé la simu malu, hetan intervensaun husi Prezidente PN hodi normaliza fila-fali situasaun diskusaun ne'e.