Liuhusi komunikadu ne'ebé Comite Central FRETILIN (CCF) hasai, reuniaun ne’e hala’o análize ba pro no kontra ba posibilidade senáriu polítika balu ne’ebé sei bele mosu no papél saida mak FRETILIN bele hola.

Maski nune'e, reuniaun ne'ebé hala'o iha CCF, Domingu (26/1), konklui ho reafirma FRETILIN nia apoiu ba Prezidente Repúblika nia inisiativa no fó konfiansa tomak ba FRETILIN nia Sekretáriu Jerál atu lidera prosesu tomak no servisu hamutuk ho entidade relevante sira hotu atu buka dalan ne'ebé atu hetan solusaun di'ak liu ba situasaun Timor-Leste.

Iha ninia intervensaun, Sekretáriu Jerál FRETILIN, Mari Alkatiri hatete, iha situasaun sira hanesan agora daudaun, importante mak atu hametin Estadu Direitu Demokrátiku no lejitimidade demokrátika.

“Bainhira ita harii Estadu Direitu Demokrátiku, ne’e signifika ita fó forsa ba lejitimidade demokrátika,” tenik nia.

Alkatiri esplika, iha Timor-Leste, problema ne’ebé Nasaun hasoru daudauk ne’e la’ós de'it problema ekonómika. Iha problema sosiál barabarak ne’ebé sobu ona sosiedade, kultura, valór no prinsípiu sira.

"Tanba ne’e duni, papél importante agora mak atu harii fila-fali tesidu sosiál atu bele fó sustentabilidade ba Timor-Leste ba oin,” dehan  nia.

Reuniuan ne'e konklui ho depozita fiar no konfiansa tomak iha Sekretáriu Jerál FRETILIN Mari Alkatiri, atu serbisu hamutuk ho Estadu no lider partidu polítiku sira seluk hodi buka dalan ba situasaun polítika atuál. (*)