Maski nune'e, deputadu sira kontinua simu saláriu hanesan ema halo servisu makaas.
Diretór Ezekutivu Forum Organizasaun Naun Governamentál Timor-Leste (FONGTIL), Daniel dos Santos do Carmo hatete, plenária iha Parlamentu Nasionál la la'o ne'e, loloos deputadu sira labele simu saláriu, hein plenária la'o maka foin bele simu.
"Membru governu no deputadu sira duadesimu la'o sira manan osan atu halo saida? Afinal sira halo orsamentu la pasa tiha maibé sira nafatin simu saláriu", dehan nia, iha Salaun São José, Katedrál-Dili, Kinta (23/1).
Tuir nia, deputadu sira tuir loloos uza tempu ne'e hodi halo diskusaun ba Lei Anti Korrupasaun (LAK), la'ós tuur hakmatek hodi hein osan saláriu.
"Se plenária la la'o laiha direitu atu simu saláriu no han matak osan povu nian", tenik Nia.
Kona-ba funsionáriu administrasaun públika sira seluk, nia dehan, bele simu saláriu, tanba sira hala'o servisu no atendementu ba públiku la'o normal hela.
Antes ne'e, depois Orsamentu Jerál Estadu 2020, xumba iha Parlamentu Nasionál, iha Sesta (17/1), seidauk iha ajenda servisu ne'ebé deputadu PN sira kria hodi halo servisu, inklui plenária mós seidauk la'o.