Posibilidade EA Nakloke Nafatin

Deputadu Somoxto Deputadu Somoxto Foto Facebook Somoxto

Tempotimor (Dili) - Veteranu no atuál Deputadu Bankada FRETILIN konsidera posibilidade eleisaun antesipada nakloke nafatin tanba lider sira rasik laiha vontade hakotu impase polítika.


"La'ós aternativa (eleisaun antesipada) di'ak, maibé ha'u hanoin dalan ikus mak ne'e. Kuandu polítiku sira laiha vontade polítika para utrapasa impase polítika ida ne'e, ita lalika repete nafatin situasaun sira ne'ebé iha kotuk,"  dehan Jose Agustinho Sequeira "Somoxto", iha Sentru Konvensaun Dili (CCD), Segunda (2/3).

Tuir nia, veteranu nia-kontribusaun ba impase polítika ne'e apelu dala barak ona liuhusi Konsellu Veteranu no pesoál maibé desizaun tomak ne'e iha lider sira. Kuandu sira la entende malu konserteza sei kontinua dala ruma to'o fali eleisaun antesipada.

Nia esplika, Prezidente Repúblika nia-laran di'ak hanesan Xefe Estadu hasai medida barak, maibé fila ba polítiku na'in sira tenke kontribui hodi utrapasa impase polítika ne'e.

"Ita laiha vontade ka ma fé, konserteza impase polítika ne'e sei nune'e hela de'it, ninia últimu rekursu tuir lider sira hasoru malu mak eleisaun antesipada," dehan Somoxto.

Deputadu FRETILIN hatutan, bainhira koligasaun foun ne'ebé forma ona mak nafatin avansa ho lista pendente membru guvernu nain sira ne'e, entaun Prezidente Repúblika mos sei kontinua nafatin la fo posse.

"Signifika katak ita ma fé atu laiha vontade atu utrapasa situasaun," tenik Somoxto.

"Konserteza eleisaun antesipada bele akontese tanba laiha dalan ona atu bolu tan partidu seluk, sira mak asume ona responsablidade atu hamutuk no iha responsablidade atu utrapasa impase polítika," nia akresenta.

Entertantu, Partidu CNRT, PD, KHUNTO,  Frente-Mudansa, UDT no PUDD forma ona koligasaun foun, maibe to'o agora seidauk aprezenta formalmente ba Prezidente Repúblika, maski Primeiru Ministru, Taur Matan Ruak, offisialmente hatama karta demisaun.

Antes ne'e Prezidente CNRT Kay Rala Xanana Gusmão liu husi intervista iha televizaun GMN ho fiar aan hatete, CNRT sei la buka Partidu seluk atu forma governu tan ba oin sa mos ninia membru sira maka pendente ate agora sei la hetan pose.

“Ba ami CNRT elisoins antesipada mak dala loos, Justa no demokratika, tanba ita Repúblika Demokrtaika de Timor-Leste,” dehan Prezidente CNRT, Kay Rala Xanana Gusmao.(*)

Rate this item
(0 votes)
Last modified on Monday, 02 March 2020 18:09
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.