"Prezidente Repúblika konvida ona Papa no Santo Padre rasik aseita ona ho konvite ne'e" dehan Nuncio, iha Palásiu Prezidensiál, Bairru-Pité, Tersa (10/3). 

Servisu halo ona durante fulan rua nia-laran, maibé, ho kazu boot Corona virus ne'ebé akontese iha mundu, nune'e hakarak atu evita virus ne'e labele da'et maka vizita ne'e sei adia. 

"Papa Francisco lakohi situasaun ne'e akontese ba povu doben Timor Leste, atu kona virus ne'e" dehan nia. 

Santu Padre rasik mós sei mai ho ema Barak husi Itália, hanesan Kardeal, Bispu sira, akompaña mós ho jornalista sira, ema lubun ne'e sei mai hamutuk iha aviaun ida no posibilidade bele lori mós virus ne'e mai Timor. 

Tanba ne'e, Papa Francisco konfirma kona-ba ninia aseitasaun no adia data vizita mai Timor Leste ba tinan oin (2021). 

"Ida ne'e hanesan sakrifísiu ne'ebé ita hotu tenke aseita, ba povu nia di'ak, ba ema hotu nia di'ak, hodi hamenus risku da'et nian", tenik Nuncio. 

Papa dehan, konfirmandu hakarak vizita duni Timor-Leste iha tinan ne'e, maibé adia de'it mak data ba tinan oin. 

Kona-ba data fiksu ba tinan oin mós seidauk klaru, tanba depende ba novidade ne'ebé hatudu kona-ba virus Corona Virus kuandu diminui ona, maka bele haree ona hodi konfirma ho ajenda Papa nian.

Kona-ba Corona, nia dehan, labele ta'uk no pániku, maibé nafatin hela iha trankilidade no vijilansia hodi hasoru virus ne'e. (*)