Hakarak Evita Corona Labele 'Rei-Malu'

Ministra Saude en ezersisiu, Dra. Elia dos Reis Amaral monstra modelu kaer liman liu husi taka liman deit Ministra Saude en ezersisiu, Dra. Elia dos Reis Amaral monstra modelu kaer liman liu husi taka liman deit Foto Fanpage MS

Tempotimor(Dili) - Relasiona ho Moras Corona Virus Diseases 2019 (Covid-19) ne'ebé sai problema mundial, inklui Timor-Leste maka  alende hases aan husi ema infeitadu, maneira seluk mak muda hahalok 'rein-malu', inklui kaer liman.


Covid-19 hanesan kauza moras respirátoriu no bele tranzmite husi ema ba ema, baibain depois kontaktu ka besik ho pasiente infeitadu hanesan iha uma, servisu fatin, sentru saude ka área públiku, tanba ne'e susar atu hasees aan. Tanba kulturalmente, Timor-Leste hanesan país sosiál, atetude baibain hasoru malu sempre kumprementa, kaer liman inklui hakuak no rei-malu.

Maski nune'e, Timor-Leste rasik dadaun ne'e sei livre husi Covid-19 hafoin Ministériu Saúde informa ofisialmente ba públiku katak pessoal sidadaun Italianu ne'ebé halo tratamentu iha Stanforld Medical durante loron 4 tanba deskonfia afetadu Covid-19 negativamente, hafoin halo teste amostra iha laboratóriu Hospital Royal Darwin-Austrália.

Nune'e, Xefe Governu, Taur Matan Ruak apela ba sidadaun hotu relasiona ho prevensaun simples moras Corona hodi halakon provizoriumente komportamentu ka atetude kaer liman no rei-malu.

Taur esplika, risku ba Timor-Leste atu hetan moras Covid-19 ne'e boot, kuandu virus ne'e mosu iha Xina, Nasaun hotu-hotu iha mundu inklui Timor-Leste buka maneira atu evakua nia sidadaun sira tanba hanoin Covid-19 iha Xina deit, maibe ikus mai virus nee alarga ba mundu tomak.

"Tanba ne'e, buat ida ke iha fatin-fatin sai orientasaun liuliu ba ita-nia komportamentu, ohin kuandu ami tama mai ita rei-malu, ita kaer liman, favor ida, iha ne'e ba oin ita halo hanesan Indianu sira nian (Taka liman), babain hau halo hanesan ne'e de'it," dehan Xefe Governu.

Entertantu, hanesan país ne'ebé iha ligasaun ho país seluk iha mundu, Timor-Leste nafatin iha ameasa husi Covid-19 tanba interdependensia, viajen entre nasaun seluk ba nasaun seluk.

Nune'e, Xefe Governu rasik hasoru malu ona ho Ministru Defeza no Ministru Interior Interinu, Filomeno Paixão de Jesus, iha Palasiu Governu-Dili, Tersa (10/3) hodi esplika kona-ba servisu Task Force ne’ebé Governu kria ona, lidera dereita husi Ministériu Saúde inklui lina ministerial sira seluk relasiona ho preparasaun ba prevensaun Covid-19.

“Primeiru-Ministru bolu ha’u para depois bele fó instrusoins, fó orden para ami Defeza ho Seguransa fó kolaborasaun ne’ebé másimu ba iha prevensaun Corona vírus ne’e”, dehan Ministru Filomeno Paixão.

Alende ne'e, Ministeiru Saúde inklui Organizasaun Saúde Mundual fo sai informasaun relasiona Covid-19 foun hanesan virus respirátoriu ne'ebé mak daet husi kontaktu ema infeitadu, exemplu mear ka fani, kabeen ka inus been, tanba ne'e importansia atu ema hotu prátika ijiene. 

Maneira prevensaun Covid-19 ne'ebé www.tempotimor.com asesu hanesan fase liman ho sabaun ka uza desifentante alkohol, bainhira mear ka fani taka inus ho lensu ka liman sikun, evita hakbesik ba ema ne'ebé fani ka inus metin, tein naan ka manutolun too tasak, hadook aan husi animal sira ne'ebé laiha protesaun. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.