Vise Xefi Bankada PLP Francisco Vasconcelhos hatete, desizaun husi koligasaun foun ne'ebé kompostu husi CNRT, PD, KHUNTO, PUDD, no UDT/FM hodi indizita Prezidente Partidu CNRT Kay Rala Xanana Gusmão ba primeiru ministru governu dasia nu'udar tentativa atu halo golpe ba estadu Timor Leste.
"Ha'u rona horseik, hodibainrua sira (Koligasaun foun) lori ona karta ba prezidente republika atu halo audensia no mós partidu koligasaun ne'e indizita primeiru ministru, ne'e sira viola ona artigu 106", dehan Vasconcelhos iha bankada PLP parlamentu nasional, Kinta (12/3).
Deputadu ne'e fo razaun, koligasaun foun atu indizita primeiru ministru, tenke konprova hodi hatudu ba prezidente republika katak, partidu maioria mak ida ne'ebé, tanba tuir konstituisaun RDTL artigu 106 katak tenke iha maioria ida mak bele indizita primeiru ministru.
"Iha meza parlamentu sira (Koligasaun foun) nusa mak indizita primeiru ministru, ne'e ba PLP katak, tentativa golpe estadu, tanba ita labele indizita uluk primeiru ministru kuandu primeiru ministru ida seluk sei iha."
Nia hatutan, meza parlamentu nasional kinta legislatura ne'e kompoin husi PLP, CNRT, Khunto ho FM ne'e hatudu katak, koligasaun foun tenke halo distribuisaun ba meza parlamentu nian, depois bele fo garantia ba prezidente republika iha maioria ida mak indizita primeiru ministru.
Nia esplika, regra juridika iha Timor Leste laiha defenisaun kona-ba governu jestaun, maibé governu ida agora ne'e plena poderes katak laiha orsamentu jeral, maibe la'o ho duadesimu to'o Orsamentu jeral estadu aprova.
"Ne'e signifika katak, enkuantu Prezidente Republika seidauk dekreta pedidu demisaun husi primeiru ministru no mantein nafatin meza parlamentu dadaun ne'e signifika situasaun la'o normal hela, tanba ne'e ami dehan tentativa golpe estadu," nia afirma.