"Situasaun Urjente" Governu Presiza Fleksibilidade Utiliza Osan Estadu

Plenaria Parlamentu iha tinan kotuk Plenaria Parlamentu iha tinan kotuk foto file

Tempotimor (Dili) - Depudatu Bankada Partidu Demokrátiku (PD) Adriano do Nascimento deklara, situasaun atuál urjente, nune'e husu atu deputadu seluk iha Parlamentu Nasionál altera Lei Jestaun Finanseira.

"Parlamentu tenke altera lei ne'e atu fó governu fleksibilidade uza osan hodi responde problema boot ne'ebé ita enfrenta daudaun hanesan Covid-19," dehan Adriano, iha Parlamentu Nasionál, Segunda (23/3).

Deputadu ne'e esplika, Estadu ne'e laiha OJE, Estadu moris ho duadesimu, Lei Jestaun Finanseira laiha fleksibilidade ba Governu atu uza osan Estadu ba nesesidade povu no nasaun ne'e iha problema virus corona tama iha ita nia rain, inundasaun dezastre naturais ne'ebé akontese halo povu halerik atu ukun nain sira tenke responde ho urjénsia.

"Governu husu ba deputadu sira atu altera lei ne'e atu fó fleksibilidade ba Governu atu uza osan ba responde nesesidade urjente Estadu nian."

Nia hatutan, Governu mai kedas ho lista esesaun ba kestaun espesífiku hanesan moras Pandemia Covid-19, inundasaun no kompromisu internasionál no mos nasionál sira.

Nia hatutan, situasaun daudaun ne'e kondisaun mínimu tebes hanesan fasilidade médiku inklui fatin Kuarentena, dezastre naturais inklui mos selu embaxada sira iha rai liur hanesan aluga uma. Nune'e, inportante atu altera lei ne'e hodi loke dalan ba Governu uza osan Estadu ho esepsaun.

Iha fatin hanesan, Deputadu PLP, Angelina Sarmento hatete, Governu aprezenta difikuldade husi utilizasaun duadesimu ho situasaun ne'ebé la prezidivel hanesan daudaun nasaun hasoru.

Vise-Prezidente PN ne'e konsidera situasaun agora hanesan estraordinária, bainhira Primeiru Ministru hatama ona nia pedidu demisaun, maibe deputadu sira ne'ebé fó votu abtensaun la halo predisaun katak Timor sei hasoru Corona virus no dezastre naturais.

"Bainhira hasoru Estadu presija osan presiza rekursu atu responde ba situasaun ida ne'e," dehan Angelina Sarmento.

Entertantu, situasaun dadaun ne'e Timor-Leste hasoru hanesan dezestre naturais ne'ebé akontese iha Dili rezultada estragu maioria populasaun nia uma no infraestrutura báziku hanesan eletrisidade, dranajen ne'ebé estimativa kuaze tokon US$ 20 no pandameia Covid-19 ne'ebé dadaun ne'e iha ona ema ida pozitivu, obriga guvernu hatama urjensia proposta alterasaun Lei Jestaun Finanseira atu Parlamentu Nasionál halo alterasaun. (*)

Rate this item
(0 votes)
Last modified on Monday, 23 March 2020 20:21
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.