Assanami: Deputadu sira Hamriik iha Liña Dahuluk Kontra Covid-19

Deputadu Mariano Asanami Sabino iha plenaria Parlamentu Nasional Deputadu Mariano Asanami Sabino iha plenaria Parlamentu Nasional Foto File

Tempotimor (Dili)-Deputadu Bankada PD Mariano Assanami Sabino husu ba membru governu, deputadu no lider partidu politiku sira atu labele izola an, maibé tenke hamriik iha liña dahuluk hodi prevene no luta hasoru Corona Virus Diasses 2019 (Covid-19).

Tuir Assanami, lider sira presiza envolve an iha ekipa preventivu hamutuk ho autoridade seguransa sira.

"Ha'u hanoin ekipa ida preventivu ne'e ita membru governu, deputadu sira, partidu polítiku sira labele izola aan, maibé hola parte iha Polisia no F-FDTL par halo mobilizasaun, bainhira moras afetadu maka'as, ita tenke apoiu populasaun, ita mak iha risku primeiru par molok povu mate, ita mate uluk tiha, se virus mak hili entaun hili uluk mak ita ida reprezenta ne'e, tanba di'ak mós ita reprezenta, aat mós ita reprezenta, moras mós ita reprezenta, se sira atu mate mós ita mak iha oin par mate uluk," dehan Assanami iha plenária PN, Kuarta (25/03/2020).

Tuir Assanami, Covid-19 nu'udar asuntu estra-ordináriu ne'ebé nasaun hotu hasoru, tan ne'e presiza aprova orsan hodi apoiu situasaun ida ne'e.

Tan ne'e, nia dehan, PD prontu apoiu orsamentu ne'ebé fó prioridade ba povu liu-liu atu halo prevensaun ba Covid-19.

"Tanba moras ida ne'e la'ós fó pensamentu ba kurativu de'it, mais preventivu ne'e sei maka'as liu. Komisaun ida ne'ebé forma ne'e ba kurativu ne'e hanoin di'ak, tanba eis ministru lubuk ida mak lidera iha ne'ebá, mais ita presiza preventivu ne'e mobilizasaun ida ne'ebé boot," dehan nia.

Deputadu ne'e preokupa mós ho estadu emerjensia ne'ebé Prezidente Repúblika husu ona autorizasaun husi PN.

"Se ita mai ho estadu emerjénsia mak ema hotu la sai, tanba ema barak mak faan nuu hodi hola foos, ema faan modo tahan mak hola foos, se sira iha uma laran hotu oinsa foos bele tama uma laran?" deputadu ne'e husu.

Rate this item
(1 Vote)
Last modified on Thursday, 26 March 2020 08:54
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.