Tempotimor (Dili)-Primeiru Ministru Taur Matan Ruak ne'ebé lidera governu konstituisionál daualu retira hikas nia pedidu demisaun ne'ebé antes ne'e aprezenta ona ba Prezidente Repúblika (PR) Francisco Guterres Lú-Olo iha loron 25 fevereiru 2020.
"Ha'u retira fila fali ha'u nia aprezentasaun pedidu demisaun ba sua eselénsia Prezidente Repúblika (PR)," dehan Primeiru Ministru Taur Matan Ruak iha Palásiu Prezidensiál bairro-pite Dili, Kuarta (08/04/2020)
PM retira nia pedidu demisaun tanba situasaun atuál presiza nia responsabilidade másimu.
"Ha'u sente katak iha momentu hanesan ne'e, nasaun presiza ita hotu liu-liu ha'u hanesan Primeiru Ministru ho ha'u nia prestasaun boot ba ita nia nasaun entaun ha'u retira fila fali," dehan PM
Entretantu pozisaun PR nian katak, kontinua apoiu ba Primeiru Ministru no governu.
"PR mós husu PM no governu atu esforsu maka'as para minimiza efeitu pandemia Covid-19 iha ita nia rai, para labele afeta ba sidadaun nia vida," dehan TMR
Entretantu pedidu demisaun ne'ebé antes ne'e Primeiru Ministru Taur Matan Ruak aprezenta ba Prezidente Repúblika Francisco Guterres Lú-Olo iha loron 25 fevereiru 2020.
Pedidu demisaun PM Taur Matan Ruak nian hela iha PR Francisco Guterres Lú-Olo nia fatin durante loron 11 hafoin PM TMR retira nia pedidu refere.