PR Lú-Olo Nafatin Fó Konfiansa Ba PM Taur

Primeiru Ministru Taur Matan Ruak hasoru malu ho Prezidente da Republika iha Palasiu Prezidensial, Dili (8/4) Primeiru Ministru Taur Matan Ruak hasoru malu ho Prezidente da Republika iha Palasiu Prezidensial, Dili (8/4) Foto Midia PR

Tempotimor (Dili)-Prezidente Repúblika (PR) Francisco Guterres Lú-Olo kontinua fó konfiansa ba Primeiru Ministru (PM) Taur Matan Ruak atu lidera oitavu governu konstituisionál iha situasaun krize ne’e.

"Nu'udar Prezidente Repúblika, ha'u hakarak fó sai dala ida tan katak  iha situasaun susar ne'ebé ita hasoru dadaun Primeiru Ministru Taur Matan Ruak no VIII governu sei mantein nia funsaun no kompeténsia tomak," dehan Prezidente Repúblika (PR) Francisco Guterres Lú-Olo iha Palásiu Prezidensiál bairro-pite Dili, Kuarta (08/04/2020) 

Xefe estadu mos haksolok kuandu parte hotu kontinua apoiu PM no VIII governu konstituisionál.

"PR haksolok katak povu tomak no forsa polítika sira hatudu mós sira-nia apoio tomak ba VIII governu no ba PM hodi kombate corona virus," dehan Aman ba nasaun ne'e 

Nia mós akresenta, governu mak orgaun ne'ebé kompeténsia hodi responde situasaun atuál. 

"Tuir ita nia konstituisaun, governu mak orgaun soberánia ho kompeténsia atu fó resposta ba situasaun sira hanesan ita hasoru daudau," dehan Lú-Olo  

Xefe eatadu ne'e dehan, "médida hotu ne’ebé PM hola, tuir kompeténsia konstitusional ne'ebé nia iha, sei hetan apoiu husi PR. 

PR mós husu nafatin ba povu tomak, sidadaun ida-idak, organizasaun hotu, privadu no públiku inklui instituisaun tomak hodi kolabora nafatin ho VIII Governu iha kombate ida ke difisil liu ne'e.

Rate this item
(2 votes)
Last modified on Wednesday, 08 April 2020 20:20
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.