Tempotimor (Dili) - Primeiru-Ministru, Taur Matan Ruak, hato'o ksolok Loron Internasionál Liberdade Imprensa nian ba jornalista hotu-hotu, espesiál ba jornalista timoroan sira ne'ebé namkari iha Timor laran tomak.
Xefe Governu sente kontente ho servisu jornalista sira-nian iha Timor-Leste, ne'ebé divulga informasaun sira ba komunidade ho responsabilidade no tuir duni kódigu étika jornalista sira-nian, maski hasoru difikuldade tanba sei falta rekursu umanu.
VIDEO PUBLISIDADE APELU HUSI PM TAUR APLAUS BA FRONT LINE
Xefe Ezekutivu agradese tebes ba servisu jornalista sira-nian iha situasaun atual ne'ebé mundu, inklui Timor-Leste enfrenta hela pandemia surtu-Covid-19, hodi ajuda komunidade sira bem-informadu.
Nu'udar Governu, liuhusi Sekretáriu Estadu Komunikasaun Sosiál (SEKomS) no organizasaun media sira-nian, Governu hakarak kontinua hasa'e kapasidade jornalista sira-nian iha área jornalizmu nian no insentiva instituisaun media sira atu iha kbiit hodi kontribui di'ak liutan ba prosesu konstrusaun Estadu no demokrasia iha rai-laran liuhusi informasaun, tanba média nu'udar pilar importante ida mós.
"Mai ita hamutuk hodi luta nafatin ba prezerva bem-estar povu nian liuhusi servisu jornalista sira-nian ne'ebé sempre sai lalenok ba ema ema hotu", tenik PM Taur. (*)
PUBLISIDADE