Vise Prezidente Bankada FRETILIN Francisco Miranda Branco hatete, deputadu na’in 33 mak ezije atu muda meza PN bazeia ba rejimentu PN rasik.

Nia hatete, meza PN la’os CNRT nia, tan ne’e la’os CNRT mak atu entrega ba Prezidente PN foun, maibé maioria parlamentar mak ezije direitu atu hili Prezidente PN foun tuir rejimentu PN nia haruka.

"Meza (PN) ne'e la'os CNRT nian ou propriedade ka milik," dehan Branco liu husi konferensia imprensa iha sala Bankada FRETILIN, Sesta (15/05).

 

VIDEO PUBLISIDADE APELU HUSI PM TAUR APLAUS BA FRONT LINE

 

 

Tanba Prezidente PN lakohi ajenda rekerimentu destituisaun, Branco dehan, hahú Segunda semana oin Vise Prezidente PN na’in rua mak sei garante funsionamentu PN.

"Segunda-feira Vise Prezidente Parlamentu Nasional na’in rua sei lidera plenaria tuir knar Parlamentu Nasional nian ne'ebé kada Segunda no Tersa plenaria iha Parlamentu Nasional, nune'e ami sei hala'o ida ne'e, tanba ami la'o tuir rejimentu, Prezidente Parlamentu mak la la'o tuir rejimentu," dehan nia.

Branco hatete, tuir rejimentu PN nian, Prezidente PN halo boikota ba funsionamentu parlamentu nian tanba durante semana rua ona PN la funsiona.

PUBLISIDADE

 

"Prezidente Parlamentu klaranente boikota, tanba fó instrumentu atu paraliza totalmente funsionamentu instituisaun orgaun soberania ida ne'e no fó orden ba funsionariu sira halo tuir, ida ne'e tentativa subversaun kontra estadu demokratiku Timor-Leste."

Branco konsidera, aktu Prezidente PN daudauk ne’e nu’udar planu ne’ebé halo ona antes hodi atinze sira-nia objetivu ba eleisaun antesipada.

"Ami hakarak deklara ba publiku katak, tentativa boikota liu husi planu ida ne'ebe hala'o tiha antes ona, tenta kria krize institusional hodi obriga Prezidente Republika hodi dekreta elisaun antisipada tuir CNRT nia hakarak, ne'ebé agora dadauk implementa liu husi Prezidente Parlamentu Nasional Arão Noe, ne'e konstitui abuzu poder i krime hasoru estadu ka krime subversaun."

 

PUBLISIDADE