Deputadu bankada CNRT Adérito Hugo dehan, tentativa ne'ebé bankada FRETILIN, PLP no KHUNTO halo hodi hada’u meza PN kuaze kompleta ona.

"Ita-boot sira akompaña husi horseik to'o ohin, tentativa ne'ebé sira halo kuaze kompleta ona. Agora Prezidente atuál (Arão) rasik ho nia ekipa legál sei lori ba justisa," dehan deputadu CNRT Adérito Hugo da Costa iha PN, Tersa (19/05)

Hugo dehan, hafoin lori ba tribunal, CNRT sei intrega ba tribunal hodi foti desizaun.

"Final husi ne'e mak Justisa ka lae. Ema hotu-hotu sidadaun atu hetan kustu ba ninia pozisaun ne'e mak tribunal. Tanba ne'e, bankada CNRT la'ós kontra saida-saida, maibé prosesu destituisaun mak la tuir regras, tanba ne'e mak ita hamriik ne'e, buat hotu mak tuir regras ita kontribui," dehan Hugo.

Nia afirma, la'ós bankada de'it mak levanta kazu, maibé Prezidente PN sesante, Arão Noé de Jesus da Costa Amaral mós iha direitu.

"La'ós bankada de'it eh, maibé atuál PPN Arão Noé mós iha nia pozisaun tuir lei ne'ebé haruka tuir prosesu, tanba ne'e regras ne'ebé so tribunal mak pronunsia see mak loos no see mak sala. Ne'ebé ha'u lakohi dehan ha'u-nia parte mak loos, sira-nia parte mak sala, maibé tribunal mak sei pronunsia," Hugo afirma.

Nia informa, hahú ohin bankada CNRT no eis Prezidente PN sei hato’o keixa ba Tribunal.