Iha lejislatura kotuk, Aniceto Guterres konsege okupa kargu Prezidente PN, maibé la dura, tanba mosu eleisaun antesipada.
Ba lejislatura foun ne’e, hafoin liu husi prosesu ne’ebé naruk no tensaun sa’e maka’as iha PN, ikus mai, Aniceto fila fali hodi okupa kargu ne’ebé molok ne’e nia la konsege tuur metin to’o nia mandate remata.
Liu husi votasaun, deputadu na’in 40 husi bankada 4, kompostu husi FRETILIN na’in 23, PLP na’in 8, KHUNTO na’in 5, no PD na’in 4, deside hodi vota a favor ba Aniceto.
Enkuantu, deputadu sira husi bankada CNRT mantein nafatin pozisaun hodi la tuir votasaun sekretu ba eleisaun Prezidente PN.
Maske iha prosesu votasaun sekretu ne'e hamosu konfrontasaun entre deputadu sira husi bankada CNRT ho bankada FRETILIN, PLP no KHUNTO, maibé la konsege iha impedimentu tanba hetan seguransa husi PNTL.
Hafoin Vise dahuluk prezidente Parlamentu Nasionál Maria Angelina Lopes Sarmento anunsia rezultadu votasaun, deputadu sira husi bankada CNRT haklalak katak, votasaun ne’e illegal no Prezidente PN illegal tanba tama liu husi dalan illegal.
Hafoin eleitu, Prezidente Parlamentu Nasional foun Aniceto Guteres katak, elisaun ne'e mai husi deputadu nain 40 mak fo votus afavor la'os husi bankada tolu de'it.
"Rezultadu votasaun ne'e ohin la'os bankada tolu iha plataforma ne'e de'it mak vota, maibe bankada seluk mos fo votu hotu nune'e ohin Prezidente foun eleitu rezultadu fo sai ona no tuir votu ne'e hau mak Prezidente Parlamentu Nasional Agora", dehan Nia iha Parlamentu Nasional, tersa (19/5).
Prezidente Parlamentu foun ne'e akresenta, kuandu Prezidente Parlamentu Nasional sesante la fo Fatin ne'e prosesu ketak ida.
"Prezidente Parlamentu Nasional atual la fo ne'e buat ketak ida ne'e prosesu seluk, ohin ne'e la'os hadau de'it, tanba iha Parlamentu Nasional ne'e maioria mak manda sa tan ohin ne'e 40 votus", tenik Nia
"Prezidente Parlamentu Nasional atual Arao la fo fatin ne'e problema ninian, Prezidente Parlamentu Nasional atu rua ga tolu mos hau iha lejitimidade liu, tanba hau ohin iha 40 votus, se nia (Arao) hela ho votu 23 ou 24 de'it ne'e nia sei iha lejitimidade par sai Prezidente, Lae ona", Nia dehan
