Khunto Husu Aproxima CNRT, UDT/FM Antes Muda Sekretaria Meza no Komisaun Sira PN

Vise Prezidente PN, Luis Roberto da Silva ko'alia ba jornalista sira iha Parlamentu Nasional Vise Prezidente PN, Luis Roberto da Silva ko'alia ba jornalista sira iha Parlamentu Nasional Foto Arkivu

TempoTimor (Díli)- Tuir Prezidente Parlamentu Nasionál (PPN) Aniceto Longunhos Guterres Lopes katak, halo mudansa ba Sekretaria meza no komisaun sira, iha Parlamentu Nasionál (PN) presiza iha konsensu de'it, entre bankada Fretilin, PLP no Khunto, maibé deputadu bankada Khunto Luis Roberto propoin, atu  halo konsultasaun ho bankada CNRT no UDT/FM molok halo mudansa ne'e.

"Mudansa ba Sekretaria meza PN, tuir Khunto nia haree ita presiza haree no liga mós ba bankada CNRT ne'ebé mak asume kargu nu'udár Sekretaria meza no bankada UDT/FM ne'ebé asume nu'udár vise-sekretária, ne'ebé halo mudansa ka mantein ita presiza halo komunikasaun ho sira," dehan Vise-PPN deputadu Luis Roberto iha PN, Sesta (22/05)

Nia mós dehan, tempu ona para halo mudansa radikál, maibé tenke iha komunikasaun nafatin.

"Tempu to’o ona para ita koopera hamutuk, halo mudansa radikál ida ba parlamentu mós ladun di'ak, tanba ne'e kontinua komunikasaun ho sira, para sira deside mantein ka lae, maibé sira lakohi bele iha mudansa, mais sira hakarak mantein, ha'u fiar katak sira mós iha direitu no dever para responsabilidade ba sira nia knaar," dehan Luis

Nia mós akresenta, labele uza maioria parlamentár hodi muda buat hotu tuir hakarak, maibé tenke iha konsultasaun. 

"Bankada Khunto, nu'udar bankada kiik iha PN Tanba ho kadeira lima de'it, ne'ebé la'ós dehan ita plataforma foun ne'ebé muda buat hotu tuir ita nia maiória parlamentár, maibé ha'u nia hakarak ne'e ita mós haree ba ita nia maluk sira ne'ebé servisu kleur ona hanesan asume kargu nu'udár  Sekretaria meza PN, ne'ebé ita presiza komunikasaun molok halo mudansa ba buat sira ne'e, será que sira hakarak mantein ka lae, entaun ita labele haree ba partidu A ka B, maibé ita presiza servisu hamutuk para asume responsabilidade hodi asume mandatu iha tinan rua nia laran," dehan Luis

Deputadu Khunto ne'e mós dehan, molok halo mudansa ba komisaun sira iha PN, tenke normaliza uluk mak meza PN.

"Molok to'o ba iha komisaun sira, ita tenke normaliza uluk mak meza PN, hanesan PPN, vise-PPN, Sekretaria no vise-Sekretaria mak normál ona, ita bele haree fila fali ba komisaun sira," dehan vise PPN daruak ne'e.

Tanba ne'e liga ba ho mudansa Sekretaria no vise Sekretaria inklui komisaun sira, Khunto seidauk iha proposta.

"Khunto seidauk iha kandidatu ruma atu ba tuur hanesan ne'e ka ba kargu ida ne’ebá ne'e seidauk, ami mantein nafatin pozisaun ida, bainhira iha ona mudansa ba mak karik maluk sira dehan presiza Khunto prienxe, entaun ami prienxe, maibé seidauk presiza ami mantein ho pozisaun ne'ebé mak iha," dehan Luis Roberto

Atuál vise daruak PPN ne'e salienta, tempu ona atu radikál iha opiniaun, la'ós radikál ba partidu.

"Khunto nia hakarak ne’e, iha parlamentu ida ne’e ita presiza koopera hamutuk ho bankada hotu-hotu, tempu to’o ona para kria unidade nasionál para halo normalizasaun ba PN, tanba ne'e ida lalika radikál liu ba ita nia partidu para hamosu fali buat ne'ebé la'ós ita hakarak, maibé tempu to'o ona para ita iha radikál opiniaun para hadi'a buat ruma," nia tenik

Entretantu bankada Khunto mós lakohi atu bankada tolu maiória iha PN mak domina buat hotu-hotu.

"Ita presiza halo komunikasaun di'ak iha PN entre bankada hotu-hotu, labele dehan Fretilin, PLP no Khunto mak domina buat hotu-hotu, ne'e Khunto mós lakohi. Maibé Khunto nia hakarak mak, maske iha mudansa polítika, maibé presiza halo komunikasaun di'ak ho bankada hotu-hotu, liu-liu bankada sira iha asentu parlamentár para asegura PN ba futuru ho di'ak," Luis afirma.

 

VIDEO PUBLISIDADE APELU HUSI PM TAUR APLAUS BA FRONT LINE

 

Rate this item
(1 Vote)
Last modified on Saturday, 23 May 2020 23:26
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.