Prezidente CNRT nia “Soldadu” na’in 7 sai, Na’in 3 Hili Mantein iha Governu

Tempotimor (Dili)-Membru governu husi partidu CNRT ne’ebé mós nu’udar kuadrus partidu CNRT deside hodi kumpre orden Prezidente CNRT hodi rezigna an husi governu konstitusional daualu, enkuantu membru governu ne’ebé CNRT indizita maibé la’os kuadrus partidu deside mantein iha governu.

Membru CNRT iha governu daualu ne’ebé nu’udar mós kuadrus partidu nian mak hanesan: Ministru Prezidénsia Konsellu Ministru, Hermenegildo Pereira; Ministru Negósiu Estranjéiru no Kooperasaun,  Dionísio Babo Soares; Ministra Edukasaun, Juventude no Desportu, Dulce de Jesus Soares; Vise Ministru Administrasaun Estatal, José Abilio Caetano; Sekretáriu Estadu Kooperativa, Arsenio Pereira; Sekretáriu Estadu Arte no Kultura, Teofilho Caldas; no Sekretáriu Estadu Juventude, Nelio Isaac Sarmento.

Enkuantu, membru governu ne'ebé indizita husi partidu CNRT mak hanesan: Vise Ministra Finansas, Sara Lobo Brites; Sekretáriu Estadu Protesaun Sivíl, Alexandrinho Xavier Araujo; no Sekretáriu Estadu ba Asuntu Kombatentes Libertasaun Nasionál, Gil da Costa "Oan Soru".

Ministru Negósiu Estranjéiru no Kooperasaun Dionísio Babo Soares dehan, nu'udar membru partidu CNRT, kumpre desizaun partidu nian, tan ne’e, ohin aprezenta ona karta rezignasaun husi governu daualu ba Primeiru Ministru Taur Matan Ruak.

 

 

"Ho respeitu tomak ohin ami mai hasoru PM, atu fó hatene desizaun partidu nian ne'e, membru partidu CNRT, liu-liu kuartu prinsipais hanesan ha'u hato'o ami-nia rejignasaun ba señor PM, liu-liu ha'u ne'ebé hanesan membru governu ne'ebé kaer pasta hanesan MNEK," dehan Babo iha Palásiu Governu hafoin reuniaun ho PM Taur, Segunda (25/05).

Tuir Babo, iha aprezentasaun karta rejignasaun ne'e, PM la menta, maibé ida ne'e ne'e mak desizaun polítika.

"PM lamenta tebes, maibé dinámika politika mak la'o hanesan ne'e, demokrásia mak hanesan ne'e," dehan Babo.

Nia afirma, hanesan membru partidu CNRT tenke kumpre desizaun partidu nian.

"Hanesan membru governu no membru partidu, ami mós respeita desizaun ida ne'e. Entaun señor PM husu katak, depois de aprezenta karta rejignasaun, entaun PM sei deside par ami hetan ezonerasaun formal tuir konstituisaun RDTL," nia dehan.

Maske desizaun partidu husu atu membru partidu hotu sai, maibé ba membru governu sira ne’ebé partidu CNRT indizita desizaun iha idaidak nian.

Ba ida ne’e, Ministra Finansas (MF) interina Sara Lobo Brites dehan, nia kontinua serbisu hanesan baibain.

"Ha'u serbisu nafatin, maske indijita husi CNRT, tanba mai hanesan tékniku, ha'u serbisu nafatin," dehan Sara.

 

VIDEO PUBLISIDADE APELU HUSI PM TAUR APLAUS BA FRONT LINE

Rate this item
(1 Vote)
Last modified on Wednesday, 03 June 2020 08:59
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.