"Bankada CNRT tuir loloos sei la tuir plenária ida-ne’e hodi hein desizaun ba rekursu ikus liu ne’ebé Bankada submete ona ba Tribunal Rekursu iha loron 29 Maiu 2020. CNRT kontinua depozita konfiansa ba Tribunal hanesan orgaun as liu atu foti desizaun, maske Tribunal hatudu ona atu lakohi foti papél tuir nia kompeténsia atu hakotu disputa legál ba implementasaun Konstituisaun Repúblika Demokrátika Timor Leste (K-RDTL) no lei oan sira. Tanba-ne’e CNRT tenke foti papél atu mai luta iha plenária ida ne’e," dehan deputadu Gabriel Alves iha plenária PN liuhusi deklarasaun bankada CNRT nian, Tersa (02/06).
Iha deklarasaun bankada CNRT katak, CNRT ho fuan boot hodi luta iha plenária PN, tanba Tribunal Rekursu la halo knaar ho loloos.
"Partidu CNRT ho fuan boot simu no respeita nafatin desizaun tribunal nian tuir konstituisaun haruka katak, tribunal nia desizaun mak aas liu iha pais de direitu demokratiku mezmu ke desizaun Tribunal nian ne’e lamentável tebes, tanba Tribunal tenta atu hases aan hodi deside materia de faktu no apenas deside indeferimentu liminár," dehan deputadu Gabriel.
Nia mós dehan, CNRT prontu luta kontra kualker se de'it mak ignora K-RDTL.
"Bankada CNRT iha PN afirma no hola pozisaun firmi hodi kontinua luta hasoru sé deit mak ignora no lakohi atu kumpri Konstituisaun da RDTL, ami sei halo esforsu tomak hodi harii hikas sosiedade demokrátika, sosiedade ida ne’ebé halo tuir deit mak konstituisaun no lei sira, sosiedade ida ne’ebé iha esperansa ba knaar justisa nian, no sosiedade ida ne’ebé mak orgullu nu'udar povu RDTL," nia dehan.