"MF aprezenta proposta lei, ne’ebé aprova ona iha KM kona-ba autorizasaun hodi realiza transferénsia estraordinária husi Fundu Petrolíferu nomós alterasaun dahuluk ba lei númeru 2/2020, loron 6 fulan abril nian, ne’ebé kria Fundu Covid-19," dehan Ministru Prezidensia Konsellu Ministru (MPKM) Fidelis Manuel Leite Magalhães iha Palásiu Governu, Kuarta (03/06).
Nia mós dehan, husi alterasaun ne'e hodi hanoin mós ba reseita fiskál tinan kotuk nian.
"Hodi hanoin mós katak reseita hirak ne’ebé mai husi reseita fiskál no saldu ezekusaun orsamentál husi tinan kotuk nian, ne’ebé komplementa husi transferénsia extraordináriu husi Fundu Petroliferu, ne'ebé autorizadu husi proposta lei nú. 2/2020, loron 6 fulan abril nian, Ia sufisiente atu finansia atividade regulár administrasaun públika nian," nia dehan.
Ministru ne'e mós afirma, aleinde ne'e orsamentu fulan agostu nian no montante ne’ebé atribui ba Fundu Covid-19 hatudu katak la kobre despeza tomak ne'ebé previstu tuir médida prevensaun no kombate ba pandemia KOVID-19.
"Diploma ida ne’e ho objetivu atu fó autorizasaun atu realiza transferénsia extraordináriu husi Fundu Petroliferu ba Orsamentu Jerél Estadu (OJE) ho valór US$ 286.800.000 hodi garante kondisaun finanseiru sufisiente ba funsionamentu normál administrasaun públika to’o loron ne’ebé aprova ona OJE 2020 nian," nia dehan.
Fidelis afirma, alterasaun ba proposta lei ne'e, atu apoiu mós ba médida ekonimia no sosiál.
"Objetivu atu klarifika katak finalidade husi fundu ne’e sei finansia mós médida ba apoiu ekonómiku no protesaun sosiál hodi hatán ba konsekuénsia ekonómika kona-ba médida prevensaun no kombate ba moras Covid-19 no krize ekonómika mundiál ne’ebé provoka husi pandemia nomós despeza ba funsionamentu fundu ne’e rasik," nia subliña.