Portavós FMTL, Novelino dos Santos hatete, liuhusi kanál média Ministru Cárceres deside kriminaliza lei difamasaun ne'e governu sei la tau prioridade.

Nia hatutan, see karik la'ós prioridade ba governu entaun Ministru Cárceres tenke deklara ba públiku katak lei ne'e sei la avansa tan.

Tuir nia, bainhira governu laiha komentáriu maka públiku konsidera katak ne’e nu’udar retórika polítika lideransa nian.

Tanba, tuir nia, órgaun ezekutivu sira ohin bele dehan laiha ona, maibé ikus ema hotu hakmatek ne'e sira avansa.

"Tanba ne'e ami haruka ona karta ba Ministériu Justisa atu nune'e tenke presta ninia desizaun ikus ba públiku katak lei ne'e sei la avansa tan," dehan Novelino ba jornalista, iha resintu UNTL, Liceu, Tersa (04/07).

Mezmu nune'e, nia mós fó hanoin ba governu, planu kria lei ne'e atu eduka sosiedade presiza investe ba setór edukasaun ka setór sira seluk ne'ebé importante.

Iha fatin hanesan, estudante UNITAL, Fidelito dos Santos hateten, iha Konstituisaun RDTL rasik ko'alia ona katak ukun ne'e hatuur metin ona iha povu soberania ne'e iha povu liuhusi reprezentativu, tanba ne'e mak nafatin luta atu bele hetan solusaun.

"La mesere lei kriminalizasaun difamasaun atu moris iha nasaun Timor tanba ita nia lei kódigu 285 ko'alia kona-ba denunsia kalunioza signifika katak sé mak halo lia-falsu ne'e krime, tanba ne'e lei kriminalizasaun difamasaun la presiza atu kria tan tanba lei espesífiku balun iha ona.

Tan ne'e nafatin mantein difamasaun sai hanesan lia-sivíl atu labele halakon liberdade espresaun iha nasaun ne'e. Liberdade povu nian ne'e importante tebes atu kontribui ba dezenvolvimentu nasaun

Lakohi lei kriminaliza difamasaun ne'e sai fali hanesan objetu ka instrumentu atu na'i ulun sira uza hodi sai instrumentu aban-bainrua sira subar karik sira komete erru. (*)