Ministru Asuntu Parlamentár no Komunikasaun Sosiál (MAPKomS), Francisco Martins da Costa Pereira Jerónimo hatete, to'o oras ne'e nia seidauk iha kandidatu ruma atu substitui Prezidente Tatoli nia fatin.
"Seidauk iha kandidatu ruma iha ha'u-nia oin, agora ha'u sei buka hela tanba ha'u mós tenke komprende saida maka Prezidente Tatoli, IP nia hakarak," tenik nia, iha ba jornalista hafoin jornada orsamentál, iha Ministériu Finansas, Aitarak-Laran, Tersa (04/08).
Nia dehan, Prezidente hatete buat lubuk ida ne'ebé ministru mós sei hanoin hela atu haree fila-fali, hodi haree fali ema ne'ebé iha duni média para atu bele tuur fali iha fatin ida ne'ebé maka Prezidente Tatoli husik hela.
Husu kona-ba antes ne'e iha Visé Prezidente na'in-rua maka forma pakote ho Prezidente Tatoli karik halo mós substituisaun, nia dehan, sei haree uluk dekretu lei ne'ebé ko'alia kona-ba rezignasaun ba prezidente ho vise prezidente sira, hafoin nia bele foti desizaun ruma.
Antes ne'e, Prezidente Tatoli ko'alia verbál ho ministru hodi husu atu komprende ninia situasaun, no agora hein depois sei haree saida maka bele atu foti ba oin.
Nia dehan, maski pedidu rezignasaun ne'e rasik molok ne'e aprezenta ona ba MAPKomS atu rezigna-aan husi kargu Prezidente Tatoli, maibé nia sei halo servisu to'o loron 30 Agostu. (*)