Ministru Jeronimo hato’o asuntu ne’e relasiona ho karta rezignasaun husi José da Costa husi kargu nu’udar Prezidente Tatoli, Ip.
“Sim, ha’u simu ona karta ida husi Prezidente Tatoli ba ninia rezignasaun. Nia husu atu rezigna, nia fó nia razaun tuir nia situasaun, tanba nia mós hanoin atu hadia nia kareira iha fatin seluk, entaun nia husu rezigna,” dehan Ministru Jeronimo iha PN, Kuarta (05/08).
Ministru ne’e hatete, nia hasoru-malu ona ho Prezidente Tatoli sesante, no husu atu mantein lai to’o 30 Agostu.
“Ami hasoru-malu i koalia ona atu nune’e husu nia atu to’o 30 de Agostu, haree lai situasaun sira ne’e hotu, pois atu bele halo hand over ho di’ak, atu nune’e ida ne’ebé mak atu subtitui nia sei halo fali kontinuasaun,” Jeronimo esplika.
Hatan kona-ba karik rezignasaun Prezidente Tatoli sesante ne’e iha relasaun ho situasaun politika, Ministru ne’e dehan, iha karta rezignasaun la hakerek kona-ba asuntu ida ne’e.
“Ha’u la haree iha karta laran hakerek hanesan ne’e (situasaun politika), nia rezignasaun ne’e mai husi nia privadu rasik, nia hakarak husu rezigna tanba nia hanoin katak nia iha fali fatin seluk ne’ebé atu halo serbisu.”
Kona-ba figura foun ne’ebé sai Prezidente Tatoli, Jeronimo dehan, molok foti desizaun, nia parte sei haree lai dekretu lei ba estabelesimentu ajensia Tatoli.
“Pur enkuantu hanesan Ministru ne’ebé mak tutela ba ajensia ne’e no mós seidauk haree hetan ema ida, agora hanoin hela, pois ha’u sei haree uluk lai, hanesan horsehik ha’u dehan ona, haree uluk lai dekretu lei ne’ebé mak estabelese ajensia Tatoli ne’e oinsa, mak Prezidente rezigna, vise prezidente, sira estrutura ne’e halonusa, ha’u sei haree pois mak ha’u sei foti desizaun,” dehan Ministru Jeronimo.
NOTA : Tempo Timor rekuinese, antes ne’e mosu erru iha sitasaun, lead no Titulu notisia iha leten ne’e. Nune’e ami husu DESKULPA ba sua excelência Ministru Asuntu Parlamentar no Komunikasaun Sosial (MAPKomS) Francisco Jerónimo. Ami mos la haluha hato’o agradecimento wain ba parte relasaun publika MAPKomS ne’ebe ajuda hatudu sai ami nia erru no mos haruka transkrisaun kompletu deklarasaun husi Nai Ministru nian ba ami hodi ami hadia fali artigu ne’e. Dá-la ida tan Obrigado Barak ba kompriensaun tomak.