PR Lú Olo informa kestaun ne’e bainhira hala’o enkontru ho organizasaun  naun-governamental (ONG) Luta Hamutuk (LH).

“Ohin ami mai enkontru ho Prezidente Repúblika (PR) kona-ba ami-nia pozisaun ba esbosu kriminaliza difamasaun ne'ebé governu inisia, maibé PR konfirma katak, governu hatete ona ba PR dehan inisiativa ida ne'e la'ós prioridade governu nian," dehan peskizadór LH Celestino Gusmão ba jornalista sira iha Palásiu Prezidensiál Bairu-pite, Dili, Tersa (11/08).

Kona-ba pozisaun PR Lú Olo nian, Celestino dehan, PR seidauk deside tanba esbosu ne’e rasik seidauk klaru.

"Pozisaun PR nian ba esbosu kriminaliza difamasaun nian seidauk pronunsia, tanba governu dehan la prioridade, entaun nia seidauk ko'alia," nia dehan.

Peskizadór ne'e informa mós katak, nia parte haruka ona karta ba Primeiru Ministru (PM) Taur Matan Ruak hodi husu atu hasoru-malu hodi koalia kona-ba esbosu kriminaliza difamasaun, maibé seidauk iha resposta husi gabinete PM.