Komitementu boot ida ne’e hato’o husi Embaixadór Xina mai Timor-Leste, Xiao Joanguo hafoin entrega ekipamentu ne’ebé apoiu husi fundasaun Alibaba ba Timor-Leste.
"Ohin ami apoiu ekipamentu protesaun saúde hodi kombate pandemia covid-19, maibé ba futuru ami mós sei apoiu kona-ba rekuperasaun ekonomia Timor-Leste ninian," dehan embaxadór Xina ba jornalista sira iha edifísiu SAMES, Kampung Alor, Kuarta (12/08).
Apoiu husi Xina ba kombate Covid-19, nia dehan, la to’o ne’e de’it, tuir planu iha fulan hirak oin mai sei iha tan apoiu balun mak to’o iha TL.
"Iha fulan hirak tuir mai, ita-boot (jornalista) sira espera katak sei iha tan apoiu balun husi Xina mai Timor-Leste. Tanba atu kombate Covid-19 ne'e presiza kooperasaun internasionál no ita hotu nia solidariedade ba malu,” dehan nia.
Nia dehan, Xina fó nia apoiu ba TL, tanba nasaun rua ne'e hanesan belun di'ak.
“Ami apoiu ami-nia belun iha tempu defisíl ida ne'e,” nia hatete.