Tempotimor (Dili)-Prezidente Parlamentu Nasionál Aniceto Guterres sente konfuzaun ho asaun manifestasaun neebé Aliansa Estudante Timor-Leste (AUTL) organiza hodi kontra desizaun governu kona-ba subsidiu ba estudante sira iha rai laran.
Iha Segunda (17/08), estudante sira husi ensinu superior hanesan, UNTL, UNDIL, UNITAL, UNPAZ, ICS, DIT, Cristal no IOB halo asaun manifestasaun kontra Ministru Ensinu Superior, Siensia no Kultura (MESSK) Longuinhos dos Santos.
Asaun nee mosu hafoin Ministru Longuinhos aprova dekretu lei númeru 21/2020 neebé obriga estudante sira husi ensinu superior iha rai laran kontinua selu propinas.
Ba asaun manifestasaun husi AUTL, Prezidente PN hatete, nia seidauk hatene klaru ezijensia husi AUTL nian.
"Primeiru, ha'u seidauk intende didi'ak estudante sira-nia hakarak loloos ne'e saida. Balun dehan ba ha'u katak sira ejize pagamentu subsídiu ne'ebé estudante iha rai liur hetan, maibé tanba saida mak estudante sira rai laran la hetan. Depois agora ita-boot (jornalista) mai tan dehan propinas semester par nian, entaun ha'u la hatene ida ne'ebé mak loos, ne'ebé ha'u lakohi fó komentáriu tanba orsida ema dehan PN apoiu de'it governu karik," dehan Aniceto ba jornalista sira iha Palásiu Prezidensiál Bairu-pite Dili, Segunda (17/08).
Liga ba asaun pasífika ne'ebé dadaun ne'e estudante AUTL sira hala'o iha resintu fakuldade Ekonomia UNTL nian, Aniceto dehan, dala-ruma estudante sira nee iha intesaun ruma.
"Estudante no ativista sira mak la hanoin ba interese estadu ne'e, ativista ba saida? Keta ativista ba ita-nia interese karaik, tanba ema dehan ativista ne'e hanoin ba interese estadu nian, seluk ne'e la'ós ativista, maibé ativista ne'e ba sira-nia interese de'it," dehan Aniceto.
Entretantu, molok nee portavoz AUTL Moises Magno deklara katak, sira la ezije subsídiu, maibé husu ba governu atu responsavél ba propinas semester par tinan 2020 nian.
“Ami-nia objetivu mak atu kestiona desizaun polítika husi ita-nia governu daualu, neebé mak foti desizaun liu husi dekretu governu númeru 21/2020 hodi fó subsídiu ba estudante timoroan la'ós bolseiru neebé hala'o estudu iha rai liur, maibé estudante husi ensinu superiór iha rai-laran la hetan, depois ami la'ós ejize subsídiu, maibé ami husu par governu fasilita ka responsabliza netik ami iha propinas ba semester par tinan 2020 nian,” nia dehan.
