Deputadu bankada CNRT, Gabriel Soares, lembra hikas ‘istoria pasadu’ ne’e no konsidera partidu Fretilin kanten poder.
Gabriel dehan, iha momentu ne'ebá PR Lú Olo deklara Eleisaun Antesipada hanesan solusaun úniku maske partidu 3 asegura hela maioria iha PN.
"CNRT hamutuk ho nia aliadu PLP ho KHUNTO iha kadeira 35 ho Maioria Parlamentár, maibé koligasaun ida ne’e la halo asaltu podér hanesan saída mak Fretilin orkestra hodi akontese iha loron 19 Maiu 2020," dehan nia liu husi deklarasaun politika iha plenaria PN, Segunda (19/10).
Realidade ne’e, nia hatete, hatudu katak CNRT sempre kumpre Konstituisaun, la ambisiozu no la kanten ba podér, ka sofre moras post power syndrome.
"Fretilin mak sofre hela moras Post Power Syndrome ne’e dezde lakon podér iha 2007," dehan nia.
Ba kestaun ne’e, Deputada Fretilin Nelia Menezes konsidera deklarasaun ne’e komik uitoan, tanba ukun tinan 10 ona mak foin hakfodak.
"Ha’u sente komik, ukun tinan 10, ohin foin hakfodak, tuun ba vizita inan-aman, joven sira, haree kondisaun povu nian, haree bee-moos laiha, eskola aat, estrada aat, ita tanis hakuak, rein tuun, rei sa'e, ita hakfodak, ita hanoin buat baibain, tanba sa tinan 10 la halo?," nia kestiona.