Oras ne’e daudaun, Horta mós loke hela espozisaun kona-ba pintura ne’ebé konvida husi Arte Moris, no konvida públiku atu bele vizita fatin ne’e.
"Kuandu laiha ona espozisaun mós loke nafatin, tanba ha’u nia espozisaun ba Prémiu Nobel da Pás nian, ita bo’ot sira hare diploma oi-oin husi universidade lubuk ida, no kondekorasaun sira ne'e nafatin permanente iha ne'e. Tanba ne’e, joven sira hakarak mai estuda, lee ita nia istória bele haree liuhusi espozisaun permanente iha ne'e,” Horta esplika ba jornalista iha Faról, Kinta (29/10).
Eis Prezidente Repúblika ne’e re-organiza ona uma ne’ebé nia hetan husi estadu hanesan eis titulár sai fatin públiku, atu ema hotu bele asesu no utiliza hanesan fatin espozisaun.
Tuir Horta, uma ne'e, públiku bele asesu iha kualkér tempu bainhira presiza atu utiliza ba espozisaun ruma.
"Orsamentu ne'ebé governu fó ba eis titulár sira, ne'e mak uza hakarak re-organiza ofice ne'e. Re-organiza atu fatin ne'e, sai mós hanesan fatin públiku ho espozisaun iha ne'e nune’e estudante liu-liu artista sira mós bele mai vizita. Públiku hakarak mai haree no bele mai tuur iha ne'e hodi estuda, jardin iha ne'e barak no internet iha ne'e gratuita", Horta esplika.