Francisco Martins da Costa Pereira Jerónimo hateten lia hirak ne’e ba www.tempotimor.com iha suku Tazhilin postu administrativu Zumalai, hafoin partisipa iha serimónia lansamentu sosa no distribuisaun produtu iha "Programa Sesta Bázika", sábadu (07/11).

Francisco dehan, ninia prezensa iha lansamentu "Programa Sesta Bázika" ne’e, atu akompaña, tanba ida ne'e parte ida husi programa governu nian ba rekoperasaun ekonómika iha kurtu prazu, ne'ebé atu halo iha tempu badak iha fulan rua nia laran.

Tanba ne'e, liuhosi nia akompañamentu ba distribuisaun produtu ba komunidade, bele sai hanesan dadus ida ba nia atu bainhira deputadu sira levanta iha plenária Parlamentu Nasionál (PN), nia sei ko’alia hodi defende.

"Ha'u hanesan Ministru Asuntu Parlamentár no Komunikasaun Sosiál, marka prezensa iha ne'e atu akompaña implementasaun ne'e la'o halo nusa. Ba iha parlamentu karik, deputadu sira foti problema ruma, ha'u iha ona dadus atu bele esplika ba sira kona-ba implementasaun programa ne’e", Francisco hateten.

Membru governu ne’e dehan, ninia prezensa, atu bele fó motivasaun mós nia membru governu maluk sira ne’ebé sai hanesan implementadór atu implementa ho di'ak, no buat ruma presiza halo avaliasaun, nia sei hateten ba sira katak ida ne'e la di'ak.

"Ida ne'e mak ha’u marka prezensa atu akompaña sira nia implementasaun, tanba ne'e programa governu nian, ita tenke akompaña, atu nune'e bele aselera implementasaun", nia dehan.

Nia mós observa katak, produtu sira ne'ebé atu distribui ba komunidade, maioria produtu lokál husi komunidade iha munisípiu Kovalima rasik.

"Sim, ohin nota katak, buat hotu-hotu produtu lokál ne'ebé iha Suai ninian, ida ne'e mak governu foti, hola husi povu rasik, depois hatama fali ba iha Sesta Bázika hodi fahe fila-fali ba hotu-hotu atu hetan fali ida ne'e hodi hadi'a sira nia moris", nia hateten.