Reprezentante UNICEF Valerie Taton hateten, labarik sira ne'ebé sei kiik (minoridade) atu asesu ba eskola, la'os fa'an fali sasan iha estrada ninin.

"Loloos ne'e labarik sira ne'ebé sei idade eskola ne'e, tenke foku ba sira nia eskola, la'os fa'an fali sasan", Valerie kestiona, hafoin hasoru-malu ho Primeiru Ministru Taur Matan Ruak iha palasiu governu, Segunda (09/11).

Tanba ne'e, hakarak buka hatene, tanba sa labarik sira ba fa'an sasan iha estrada depois la ba eskola.

"Agora hala'o daudauk estudu ida oinsa atu hatene fenomena, tanba saida mak labarik sira ba estrada la ba eskola, tanba saida familia haruka sira ba iha estrada, tanba ne'e hakarak buka hatene didiak ninia kauza ", nia informa.

Nia mos dehan, lejislasaun iha ona, agora ba eskola gratuita no obrigatóriu ba labarik sira, tanba ne'e UNICEF hakarak buka hatene, tanba saida labarik sira ba iha estrada, karik sira laiha eskola seluk ona ou oinsa.

Nia argumenta, atu minimiza labarik sira fa'an sasan iha dalan ninin, importante mós buka atu servisu ho sira nia familia.

Iha sorumutu ne'e, Primeiru Ministru Taur Matan Ruak agradese tebes ba UNICEF ninia apoiu ba dezenvolvimentu durante la'o iha Timor-leste no espesiál durante kombate surtu Covid-19.

"Primeiru Ministru mos fo mensajen oinsa atu hare ba edukasaun privadu sira iha Timor-Leste no importante liu mak hare oinsa kombate mal nutrisaun", nia konta tuir.