Cedelizia prontu levanta kazu ne'e, tanba nia hare iha karta ezonerasun ne'ebé haruka husi prezidente PN Aniceto Guteres, hakerek mós kona-ba aktu hirak ne'ebé akontese iha dia 18 no 19 maiu 2020, inklui ahi ne'ebé mate lakan iha Parlamentu Nasionál.
“Iha karta hatete buat balun, liuliu akontesimentu sira iha 18 no 19 maiu 2020 liubá, bá-oin ha’u sei lori kazu ne’e hanesan sidadaun ida ba tribunal, nune’e tribunál mak bele hateten loloos sé mak sala no sé mak loos," Cedelizia hateten liu husi telefone, Tersa (24/11).
kuadru husi partidu CNRT ne'e konsidera, iha karta ezonerasun ne'e prezidente PN halo akuzasaun falsu.
"Agra ha’u sei hare hela prosesu ne’e, ha’u seidauk fó hatene bainira, ha’u sei analiza hela karta ne’e depois mak informa ba públiku," nia dehan.
Cedelizia espresa ninia sentimentu, sei lori ba tribunál tanba iha momentu nia asume parta sekretária jerál PN liuosi prosesu rekrutamentu, inklui prosesu tomak mak hodi tama iha-ne’ebá, maibé la’ós hetan nomeasaun husi partidu polítiku.
“Ha’u sente ladún justu tanba ha’u simu karta ne’e dehan oin kedas, dehan ha’u tenke sai, ha’u sente seidauk halo krime ruma,” nia lamenta.
Kona-ba kestaun ezonerasaun, Cedilizia hateten nia prontu entrega fila fali karreta sira-ne’ebé durante ne'e nia uza, bazeia ba despaixu Prezidente Parlamentu Nasionál.(*)