Relasiona ho id ne'e, Deputadu Luis Roberto husi bankada KHUNTO, husu membru sira atu devolve osan povu nian ba kofre estadu ne’ebé sira uza durante fulan tolu nia laran.

“Membru Komisaun Inkéritu Parlamentár na’in 11 ne’e inkapasidade, tanba imi na’in 11 tuun ba baze ne’e fó importansia ba partidu ida-idak nian", dehan nia, iha Uma Fukun PN, Tersa (30/4).

Nia hatutan, membru KIP na'in 11 ne’ebé tuun ba iha terenu ne’e kada deputadu, kada loron simu osan $80, entaun sura hamutuk ne’e hira. Tanba rezultadu laiha. diak liu fó fila povu nia osan ba kofre estadu.

“Servisu durante loron sianolu ne’e rezultadu laiha, imi ba halo saida iha baze? La’os ba servisu hamutuk para mai iha rezultadu ida, mas la hetan tiha aprovasaun depois mai hatun malu no ko’alia barak iha plenária, ne’ebé buat ne’e kaduka ona. Se bele fó falo osan povu nian, tanba imi nia servisu rezultadu laiha”, dehan Luis.

Entretantu, Deputada Nélia Menezes dehan, maski Governu deklara hein rezultadu Komisaun Inkéritu Parlamentár mak halo pagamentu ba 143 projeitu ne’e, maibé iha Parlamentu liu-liu komisaun rasik la hetan aprovasaun.

Nune’e, Deputada Olinda Guterres rekoñese nia-aan hodi la fó aprovasaun ba relatóriu Komisaun Inkéritu Parlamentar tanba bainhira ekipa ba halo fiskalizaun iha Munisipiu Vikeke deputada ne’e la hetan seguransa ne’ebé proteze nian. Tanba ne’e, deputada ne’e haruka deputada seluk abandona relatóriu KIP nian.