Komunidade Timor-Oan iha Darwin Husu “Prezensa” Governu iha Komemorasaun 20 Maiu

Komunidade TimorOan tebe-tebe hodi selebra aniversariu independensia ba dala 45 iha 28 Novembro 2020 Komunidade TimorOan tebe-tebe hodi selebra aniversariu independensia ba dala 45 iha 28 Novembro 2020 Foto Suplai

Tempotimor (Díli)- Komunidade Timor-Oan ne’ebé oras ne’e iha Austrália husu ba governu Timor-Leste (TL) atu marka prezensa iha sira nia leet liuliu iha komemorasaun loron nasionál ne’ebé sei selbra iha 20 fulan maiu tinan 2021.

Cordenador Open University Units iha Charles Darwin University, Egas Alves (55) hateten, komunidade timoroan iha Darwin kada tinan sempre halibur malu hodi selebra loron nasionál sira timor nian ho atividade oioin liuliu misa agradesimentu no isar Bandeira nasionál Timor-Leste nian.

Tanba ne’e Egas reprezenta timoroan sira nia hanoin no aspirasaun durante ne’e, hakarak konvida oitavi governu konstitusionál atu nune’e iha 20 fulan maiu, se posível Primeiru Ministru bele marka nia prezensa iha Darwin.

Nia hatutan, se Primeiru Ministru Taur Matan Ruak labele marka Prezensa bele delega hela membru governu ida hodi reprezenta governu iha timoroan sira nia leet nu’udár forsa ida hodi enkoraja no hametin liu tan espriritu nasionalizmu timoroan nian ne’ebé namkari iha rai Darwin.

“Hanesan membru komunidade Timor Oan nian, ha’u nia hare atu diak liu bele halibur Timor Oan hotu maka - karik Primeiru Ministru ou delegadu husi governu, karik figura bot ruma ne’ebé bele hako’ak ema hotu, mezmu ema la gosta nia partidu mas nia figura importante ba Unidade, bele mai hamutuk ho ami iha dia 20 de Maiu 2021, iha Darwin”, Egas Alves ba www.tempotimor.com via telefónika, ohin.

Entretantu, timoroan sira iha Darwin sempre organiza malu hodi komemra loron boot sira ka loron nasionál timor nian hanesan 20 de Maiu, 30 de Agostu, 12 de Novembru, 28 de Novembru.

Foin lalais timoroan sira ne’e mós hamutuk ho konsuladu timor nian iha Darwin komemora loron juventude nasional 12 novembru no loron proklamasaun unilateral independensia timor nian ba dala 45 ho atividade oioin ho tema principal mak hanesan "Revival of Timorese nationalism”.

Egas esplika, ho tema ne’e hakarak hamanas fila fali Timor Oan sira nia Nasionalizmu, Hametin fila fali Timor Oan sira ne’ebé dok ou lakon ligasaun ho Timor-Leste, atu bolu sira fila hanoin sira nia rai moris fatin.

Komunidade TimorOan, Belun Timor Leste no konvidadus sira hola parte iha seremonia icar bandeira iha aniversariu independensia RDTL ba dala 45 iha darwin 

 

“Nune’e liliu- atu buka hametin Timor Oan nia Unidade - Bele maihusi Partidu selu-seluk ka rasa selu-seluk, organizasaun seluk, maibé mesak Timor Oan hotu no Timor-Leste ba Timoroan hotu Nian”, nia subliña.

Durante preparasaun deside hodi halo atividade husi kedas dia 12 de Novembru to’o 28 de Novembru ho atividaade ne’ebé halo maka hanesan: Iha 12 de Novembru (Kinta Feira) ba hotu rate no tau Ai-Funan.

Partisipa mós iha rate ne’ebé maka Prezidente husi ROTARY CLUB (ne’ebé ajuda mós Timor-Leste), ativista Malae sira hanesan Wesley Smith, no maluk Timor Oan sira.

Missa Komemorasaun loron 12 de Novembru iha Domingu dia 15 de Novembru, Partisipa iha missa ne'e, Membru Parlamentu Austrália nian (Reprezenta Darwin) Mr. Luke Gosling, Embaixadora Timor nian iha Austrália, Senhora Inés Almeida, no konvidadu bot sira seluk.

Selebra missa ne'e maka Bispu Eugene Hurley maski Reforma ona, maibé sempre halo missa nafatin.

Dia 21 de Novembru ami halo - "Tug_War Game" (Dada Tali), Labarik sira halai taru, Labarik sira tau Manu Tolun iha Kanuru depois tata kanuru ne'e maka halai taru, File e BBQ iha kalan.

“Atividade ne'e ami halo entre Timor Oan deit - Bairu kontra Bairu. Dada Tali entre Senhoras kontra Senhoras - Depois Labarik sira - Depois Mane. Rame Tebes. Dia 28 de Novembru - dader ami organiza Isar da Bandeira de Timor-Leste. Depois lokraik hatun fali, tuir kedas ho Festa”, nia konta tuir.

Partisipa mós iha Isar da bandeira ne'e Consul Indonezia nian mai Darwin, reprezentante husi Governu NT, no bot sira seluk husi Governu Austrália, inklui Consul Honorario Portuguese nian. (*)

Rate this item
(0 votes)
Last modified on Sunday, 06 December 2020 08:34
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« January 2021 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks