Atuál deputadu KHUNTO ne'e afirma, momentu ne'ebá nia hanesan antesesór diretór nasionál ba terras no propriedades, iha Governu da-haat nia tempu, maibé altura ne'e nia pozisaun mak hare liu ba servisu tékniku nian, no la'ós ba polítika.

Ne'e duni, nia konsidera informasaun balun kona-ba kestaun tansá iha kontratu entre kompaña ENSUL ho governu laiha reseita ruma ba governu, ida ne'e governu mak hatene.

Eis diretór António Verdial ko’alia ne'e tanba nia haree katak, agora kestaun governu troka malu hahú husi kuartu governu no agora tama ona ba oitavu governu, entaun nia mai tiha ona hanesan reprezentante povu, tanba ne'e nia parte akompaña no rona de'it, no sei la ultrapasa servisu ne'ebé órgaun ezekutadór sira halo.

"Momentu ne'eba diresaun nasionál terras propriedade rona de'it informasaun dehan katak, akordu ne'e halo to'o tinan 50. Maibé, hanesan diresaun nasionál ba servisu kadastrais, tempu ne'ebá hola responsabilidade iha aspetu tékniku de'it. Aspetu polítika ne'e la kabe mai iha konpeténsia diretór nasionál terras propriedades no servisu kadastrais nian," António deklara iha PN, Kinta (7/1).

Kona-ba legalidade akordu kompaña Ensul ho governu TL ne'e nia esplika kontratu ne'ebe halo ne'e la'ós ministériu justisa de'it mak halo, maibé ne'e interministerial, ministeriu ekonomia no ministeriu justisa mak halo.

Husu kona-ba seraké Timor-Leste mak hakarak atu Kompaña Ensul uza rai durante tinan 10 la selu buat ida ba estadu, ne'e nia parte rezeita atu fó komentáriu, maibé hanesan sidadaun ida no atuál deputadu, hakarak fó sujestaun de'it di'ak liu governu tenke foti inisitiva ruma hodi regulariza objetu hirak ne'e.(*)