Sekretariu Estadu Teras Propriedades, Mario Ximenes dehan, kazu ne'e tenke hato'o ba Primeiru Ministru, tanba gabineti ne'ebé lidera direita husi nia mak komete.

"Sim, ida-ne'e ha'u tenke ser informa, tanba akontese iha ha'u-nia gabineti ne'ebé ha'u lidera ba, ne'ebé ida-ne'e hakarak ou lakohi buat ne'e buat parte ketak ida, ne'e kompeténsia justisa nian ne'ebe depois mak informasaun atu klaru liután ita boot sira sei rona ikus mai husi parte justisa ninian", dehan nia hafoin sorumutu ho Primeiru Ministru Taur Matan Ruak iha Palásiu Governu, tersa (19/01/21).

Iha sorumutu ne'e, Primeiru Ministru Taur Matan Ruak hateten, Diretór Jeral Teras Propriedades fuan tenke brani hodi simu realidade.

"Primeiru Ministru fó hatene mai ha'u, ita hotu tenke ser simu realidade, fuan tenke ser forte para bele hasoru saida mak kona-ba ita, vida moris iha mós aat, atu di'ak ita simu aat mós ita tenke ser simu," tenik nia.

Nia parte laiha kompeténsia atu fó sala no loos ba ema ida.

"Hanesan ne'e, ha'u- nia superiór direita mai señor Ministru, eh buat ne'e Ministru ko'alia ona, eh asuntu ne'e agora daudaun iha hela parte justisa nian liman, ha'u nein iha kompeténsia ituan atu dehan ema ne'e sala, la'ós ha'u-nia kompeténsia só justisa buat hotu la'o hela ikus kuandu iha ona desizaun ruma ita boot sira hatene," nia akresenta.

Nia informa, prosesu hotu entrega ba justisa, tanba asuntu sira hanesan ne'e kompeténsia justisa nian.

"Ida-ne'e ita entrega tomak ba parte justisa nia kompeténsia, ami só motiva ami-nia funsionáriu sira para labele hakfodak ho situasaun sira-ne'e hodi bele fó prestasun servisu di'ak nafatin ba instituisaun estadu nian", nia relata. (*)