Ministru hato'o ejizénsia ne'e tanba manán na'in ba tenderizasaun projetu konstrusaun RTTL-EP ne'e, maka kompaña Mistu.

Ministru Jerónimo haktuir, iha tinan rua, kuandu loke prosesu tenderizasaun kompañia Mistu aplika no nia maka nu'udar manán na'in ba projetu ida-ne'e.

''Kompañia ida-ne'e kan ema timor-oan ho ema estranjeiru mak kaer, agora hanesan ministru foun mai haree katak, buat ne'e mak ha'u ejize atu kompañia ne'ebé maka ho ema ne'ebé estranjeru ne'e hotu-hotu tenke iha ne'e, labele agora sira iha tiha Malázia entaun ha'u husu para sira atu mai, atu nune'e asina kontratu ne'e, hodi bele hahú estudu viabilidade ne'e,'' nia deklara ba www.tempotimor.com iha Parlamentu Nasionál, segunda (25/1).

Kona-bá orsamentu ba prosesu konstrusaun ne'e, nia esplika, iha tinan ne'e governu tau ona orsamentu maibé kompañia mak seidauk bele mai asina kontratu tanba tuir informsaun katak kompañia ne'e ninia parseiru oras ne'e iha hela Malázia.

Nia parte fóprazu ba kompañia ne'e atu bele mai aprezenta no hatete loloos ba governu katak, sira-nia parseiru sira to'o ona ka seidauk.

Pergunta kona-bá tanba sá la buka kompañia sira seluk para labele atraza prosesu ida ne'e, Ministru Jerónimo deklara, kona-bá prosesu ida-ne'e, bainhira nia asumi pasta hanesan ministru foun, haree tenderizasaun ne'e la'o tiha ona, entaun só mai para kontinuasaunno laiha dalan atu kansela prosesu ida-ne'e.

''Ita presiza halo di'ak lai tanba ema manán tiha ona ita labele kansela de'it maibé ita tenke halo fali negosiasaun sira atu nune'e sira bele lori ema sira-ne'e mai,'' dehan nia.

Nia haktuir, sé kompañia kontinua labele lori sira-nia parseiru mai, entaun ne'e buat seluk ida, maibé momentu sira dehan katak sira sei bele, tanba ne'e mak parte governu mós hein hela ne'e.
Nia fiar katak, se wainhira sira mai asina Konstrusaun ida ne'e, hanoin katak prosesu estudu viabilidade no konstrusaun sei la'o.(*)