Ministru Prezidénsia Konsellu Ministru Fidelis Leite Magalhães haktuir, despaxu Primeiru Ministru Taur Matan Ruak nian autoriza ona ekipa sira atu reativa SIJK.

"Atu informa de'it katak, sei iha publikasaun tempu badak ba despaxu husi Primeiru Ministru kona-ba ativasaun Sentru Integradu Jestaun Krize nu'udár sala de situasaun", dehan nia liuhusi konferénsia imprensa, iha Palásiu Governu, tersa (02/01/21).

Bazeia ba lei seguransa nasional, no husi dekretu lei numeru 24/2020 artigu 6 loke dalan atubele iha ativasaun ba funsionamentu Sentru Integradu Jestaun Krize.

"Sala de situasaun ida sei sede iha Dili nafatin, maibé ho kriasaun unidade territoriál," nia afirma

Iha Unidade territoriál ne'e sei fahe ba unidade tolu, unidade tereitoriál RAEOA, sede operasaun sei estabelese iha Pante Makasar, unidade territoriál iha Munisípiu Bobonaro sentru estabelese iha Maliana, no unidade' territoriál Kovalima ho sentru operasaun iha Suai.

"Foin publikasaun prevee ona despaisu sei tama iha vigór hahú dia 2. Ida-ne'e bele prepara ho tempu badak ne'ebé iha prepara para hamoris fila-fali Sentru Integradu Jestaun Krizi nu'udár sala de situasaun nomos alarga tán sentru operasaun sira iha RAEOA, Kovalima, no Bobonaro," nia relata

Nune'e, tuir lei komandante operasional mak nafatin Primeiru Ministru Taur Matan Ruak.

"Lei fo dalan atu halo Sentru Integradu Jestaun Krizi ne'ebé mak ezisti permanente, maibé iha situasaun krize hanesan ne'e nakfilak nia mos halo knar hanesan sala de situasaun," tenik nia.

Kazu pasiente Covid-19 ne'ebé dadaun baixa hela iha sala izolamentu sentru Vera Cruz hamutuk na'in-20 no ida iha izolamentu Oekusi, nune'e total kazu pozitivu dadaun iha Timor-Leste hamutuk na'in 21.

Nune'e mós sira-ne'ebé ativu hela iha kuarentina obrigatóriu no auto-kuarentena hamutuk 410. (*)