Kordenadora Jerál Komisaun COVID-19, Odete da Silva Viegas, hateten kazu konfirmadu pozitivu Covid-19 hamutuk na’in 14 kompostu husi feto 8 no mane 6.

Odete informa, husi na’in-14 ne’e sidadaun estranjeiru na’in-rua no seluk Timor-oan hotu inklui mós estudante na’in-hitu.

Entre ema na'in hirak ne'e idade kiik liu mak tinan 20 no idade boot liu mak 54 no oras ne'e sira asimtomátiku ka laiha síntoma

"Na’in 12 mai husi Indonézia husi provínsia ne’ebé la hanesan, iha 20 janeiru 2021, sira tama Timor-Leste liuhusi pontu entrada Batugade ho pasajeiru hamutuk na’in-118," nia informa liuhusi Konferénsia Imprensa, iha Palásiu das Cinzas, Kaikoli, kinta (11/2).

Na’in-12 halo konfinamentu obrigatóriu iha ótel hirak ne’ebé governu prepara.

"Ekipa vijilánsia halo teste swab dala-tolu ba na’in-12 ne’e (21 janeiru, 1 fevereiru, 9 fevereiru). Rezultadu teste hatudu katak pasajeiru hirak ne’e hetan kazu pozitivu COVId-19," dehan nia.

Nia haktuir, entre na’in-14 ne’e iha na’in ida nu'udar médiku ne'ebé durante halo atendimentu iha kuarentena ótel Time Square.

"Na'in-ida tama mai Timór iha 23 janeiru 2021, sidadaun ne’e mai ho bís (transporte públiku) husi Provínsia Kupaun, Indonézia ba Atambua. Iha loron tuirmai (24 janeiru) nia viajen husi Atambua mai Timór liuhusi pontu entrada fronteira Batugade. Ekipa liña frente simu no submete ba konfinamentu iha Batugade, Munisípiu Bobonaro," nia informa.

Odete hateten, iha 24 janeiru serbísu vijilánsia ministériu saúde ba foti amostra swab dahuluk, depois 9 janeiru halo tan teste swab daruak nian no rezultadu pozitivu relata iha 10 fevereiru 2021. Ekipa ambulánsia evakua ona pasiente ne’e mai Izolamentu Vera Cruz, Dili.

Totál komunidade ne’ebé kuarentena iha Batugade hamutuk ema na’in-36 inklui pasiente pozitivu no na’in-35 seluk tama klandestina ka liuhusi dalan ilegál.

"Ohin ministériu saúde mós fó sai tan pasiente rekuperadu Covid-19 na’in 5 husi izolamentu Vera Cruz kompostu husi feto 3 no mane 2, husi na’in 5 rekuperadu ne’e na’in 1 mak estranjeiru. Sira-nia teste ikus iha 8 no 10 fevereiru, husi teste swab rezultadu negativu nune’e ohin sira fila ona ba idak-idak nia família," nia katak.

Bazea ba kazu sira ne'e, kazu kmulativu teste hamutuk 19919, komulativu negativu 19717, hein rezultadu 102, komulativu kazu 100.

Purtantu kazu foun pezitivu 14, Rekuperadu 5 no komulativu rekuperadu 66.(*)