Kooperasaun ida-ne'e formaliza liuhusi asina nota entendimentu ida entre PCIC ho parte Laboratóriu Nasional Saúde nian ho durasaun ba tinan rua.

Diretór Nasional Polícia Ciêntifica Investigaçăo Criminal (PCIC) Vicente Fernandes e Brito hateten, kooperasaun refere sai nu'udar dokumentu ida hodi haree ba asuntu formasaun nian iha futuru mai.

"Ninia kobertura abranje to'o troka informasaun, ne'ebé ami bele konklui katak ho destakamentu estajiadu PCIC nian ne'ebé halo ona estájiu iha labotóriu ne'e hanesan inísiu ida husi kooperasaun", dehan Diretór nasional Policia Ciêntifica Investigaçăo Criminal (PCIC), Vicente Fernandes e Brito hafoin formaliza nota intendimentu iha Sala auditória PCIC nian iha Kaikoli, sesta (19/02).

Nia konsidera formasaun nee, pretenente tebes tanba husi parte rua iha hotu nia laboratóriu rasik, liuliu Ministériu Saúde (MS) ne'ebé iha ona laboratóriu nasional.

"Objetivu prinsipal husi memorandu entendimentu ida-ne'e maka iha área formasaun, kapasitasaun téknika iha servisu sira laboratoriál nian ne'ebé permite halo atividade sira hanesan formasaun, halo estájiu, troka boa-prátika, koñesimentu sira iha área laboratorial para nune'e atubele fasilita, no dezenvolve rekursu umanu ne'ebé kapasitadu hodi bele servisu iha área laboratótiu PCIC nian hodi fó apoiu ba iha investigasaun kriminál", tenik nia.

Nia hatutan, kooperasaun ne'e ko'alia mós kona-ba troka informasaun sira-ne'ebé iha ligasaun liu ho matéria sira iha laboratoriál, formasaun tékniku sira hanesan ekipamentu DNA, Toksiolójia droga nian ho mós formasaun iha área sira seluk, sá tan bainhira iha mudansa iha tipu teknolojia, entaun formasaun kontinua la'o.

Tanba ne'e, ho memorandu intendimentu ne'e bele loke dalan nomós oportunidade atu instituisaun rua ne'e bele reforsa dezenvolve rekursu umanu ne'ebé liga ho laboratóriu nian.

"Tanba sénsia ne'e la'ós materia fásil, matéria ida evolui loron-loron, tinan-tinan kuandu iha ninia tekonolojia foun, ita presiza formasaun hodi bele update informasaun sira ne'ebé kondiz ho situasaun reál", hatete nia.

Nia esplika, formasaun kona-ba estájiu ba membru PCIC sira, sei hala'o kada loron nomós formasaun sira profisionál nian ne'ebe iha ámbitu koñesimentu no boa-prátika, nune'e bainhira iha prátika ne'ebe di'ak iha PCIC, bele troka ho laboratóriu nasionál saúde nian.

"Hanesan Ita-boot (jornalísta) sira hatene katak ho intervensaun laboratoriál, ho servisu laboratoriál ita bele konduz investigasaun ida-ne'ebé bele esklarese, rekolla prova sira ne'ebé ita sei hala'o hodi bele lori ba iha tribunál", dehan nia.

Iha fatin hanesan, Diretora Laboratoriu Nasional Saúde (LNS), Endang Soares da Silva, hatutan objetivu husi nota intendimentu entre parte rua ne'e, atu haree liu ba iha servisu laboratoriál liuliu ba iha formasaun.

"Husi servisu laboratóriu nasionál, maske ami haree ba área diagnóstiku, no PCIC haree liubá investigasaun kriminál ninian, maibé ami servisu hamutuk liután hodi ajuda estadu Tmor-Leste iha área sira investigasaun kriminál nian ne'ebé PCIC rasik hala'o", nia hakotu.(*)