Bazeia bá Diploma Ministerial konjunta entre Ministériu Saúde ho Ministériu Finansas ho númeru 34/IX/2020 loron 27 fulan-outubru ne'e mak, garantia atu Laboratóriu Nasionál halo teste bá ema sira ne'ebé viajen bá estranjeiru ho aplikasaun kustu.
Diploma Ministerial konjunta ida ne'e, hahú validu kedan iha tinan 2020 to'o mai tinan 2021.
Teste Covid-19 PCR ka SWAB ne'ebé aplika bazeia ba diploma Ministerial ho kustu ne'e, tanba ema ne'ebé atu viajen bá estranjeiru mak mai husu rasik atu halo teste privadu.
Nune'e, teste Covid-19 PCR ne'e aplika de'it ba ema ne'ebé mak hakarak atu teste hafoin halo viajen ba estranjeiru, teste SWAB ne'ebé aplika iha rai laran ne'e ba ema hotu gratuita.
"Sim, informasaun ne'e tuir diploma Ministerial konjunta, ida ne'e ita aplika bá sira ne'ebé mak halo viajen bá estranjeiru, tanba atu viajen bá estranjeiru, nasaun ne'ebé sira atu bá ne'e presiza, ezijensia katak, tenke halo teste PCR, sira tenke iha medical Certificate ba free Covid”, dehan nia, liuhusi telefone, tersa (23/03).
Atu livre husi Covid-19 ne'e, sira tenke teste, tanba husi nasaun ne'ebé sira atu viajen ba ne'e mak husu.
Tan ne'e, iha tempu ne'ebá iha diploma Ministerial ida ko'alia katak, sira ne'ebé atu ba ezije ho rekejisaun hanesan ne'e, tenke selu, tanba Timor aplika halo teste ba ema sira iha kuarentina, auto-kuarentina, teste ba triajen, vijilansia sentinela.
"Ema sira ne'ebé husu ne'e hanesan privadu, halo teste privadu medical certificate ba free Covid, ida ne'e mak ita tau iha desizaun katak, iha diploma Ministerial tenke aplika kustu, ida ne'e aplika tiha ona iha tinan kotuk, to'o agora sei aplika, maibé aplika nafatin bá ema sira ne'ebé viajen bá estranjeiru", dehan nia.
Maibé depende mós ba nasaun ida ne'ebé mak sira atu ba, hakarak halo teste ka la presiza teste, sé nasaun ne'e dehan presiza halo teste, entaun tenke halo teste, antes halo viajen.
Kustu ne'ebé laboratóriu nasionál saúde aplika mak, rezultadu foti iha oras 4 nia laran ho kustu US$120, iha oras 24 ho kustu US$40, iha oras 28, ho kustu US$35. (*)
