“Fila fali ba kotuk uituan, hau hakarak dehan deit katak Xanana rasik iha Janeiro 2000, iha nia uma iha Licedere, ho prezensa saudoso Sergio Vieira de Mello nian, tanba rejeita ho reorganização FRETILIN deklara mai hau ho arrogânsia: "Iha rai ida ne'e hau bele harahun Partido ida nebe'e deit". Hau hatan: " Hau prontu atu hasoru", deklara Alkatiri iha ninia pájina facebook, sesta (26/03).
Alkatiri iha ninia pájina ne’ebé www.tempotimor.com asesu iha loron sesta (26/03) hatete, líder sira balu, lider sira ne’ebé base laiha, ansi tebes atu haree tranzisaun ba lideransa iha FRETILIN nia let.
“Sira husik FRETILIN tinan tolunulu-resin ona. Ikus mai tabele ba Xanana Gusmão (XG). Sira rasik dehan mai hau iha tinan 2000, hanesa ne'e: " Mari! Iha Timor-Leste se'e maka kontra Xanana ne'e hanesan nia hakarak oho nia a’an rasik". Hau hatan: Hau la kontra ema ida, hau defende FRETILIN", dehan nia.
Líder Partidu Fretilin reforsa ba líder ida ne'e, hothotu tenki banati tuir nia karik. Hakru'uk to'o hakdasak de’it ba XG.
“Ba líder ida ha’u ko’alia ba ne'e, ema ne’ebé atu sai FRETILIN nia líder foun tenke ema ida prontu atu hakru'uk ba XG. Di’ak liután se iha pasadu ema ne'e hatudu ona ida ne'e, no agora daudauk Xanana foti nia hanesa XG nia "anak emas" ("filho querido")”, afirma nia.
Eis Titular ne’e esplika, hothotu tenke hatene katak iha FRETILIN iha kuadru potensial barak atubele garante sai defensór valór sira no prinsípiu sira FRETILIN nian no hatene de’it hakru'uk ba FRETILIN ho nia Órgãos competentes. No, hanesan Partidu Fundadór Estadu, hakru'uk de’it ba konstituisaun no lei, defende Estado de Direito Democrático".
Tanba ne’e, Alkatiri dehan, iha jerasaun FRETILIN tuir kedas jerasaun Fundador mós iha kuadru sira ho kapasidade boot, no sira nunka husik FRETILIN, biar iha tempu susar okupasaun Indonézia, no hanesan iha krize 2006. Sira nunka rejeita atu defende no halo kampaña ba FRETILIN iha tempu susar hanesan tinan 2007/2008.
“Líder FRETILIN aban bainrua, tenke ema polítiku ne’ebé konsistente atu defende uluk FRETILIN. (Balun, situasaun susar iha 1979/82/83, husik kedas FRETILIN no ida-idak buka nia dalan atu buka moris). Iha 2006/07 mós balu tuir duni dalan ida ne'e”, dehan nia.
Alkatiri hatete, “(Teknokrata de’it, maibé "ai kakeu" hanesa polítiku, la serve atu sai Líder FRETILIN nian. Bele serve sai asesor tékniku manán osan boot iha Governu karik??!!). Esperiénsia mós hatudu ona ida ne'e.
Tanba, agora balun foin hakfodak no hanoin iha direitu atu ko’alia halo interferensia iha FRETILIN nia vida.
“Ha’u husu ba XG nia bajuladores, husi jerasaun ida ne’ebé, de’it atu lalika kahur sira-nia kanuru nakonun ho besi-ten (ferujen) iha bikan FRETILIN nian. FRETILIN hatene ukun nia-an rasik no prontu atu hasoru adversário ida ne’ebé de’it, liliu profeta falsu sira ho nia seguidores sira”, hakotu Alkatiri ho lia-fuan abrasu. (*)
