Husi totál orsamentu US$93,1, sei oferese uluk rihun US$100 ba Timor-Leste hodi responde ba problema natureza ne’ebé akontese iha domingu loron 4 fulan-abril 2021.
Aleinde tokon US$93, ne'e govenu EUA oferese ba governu TL, atu atende projetu multi programa tinan-lima nian iha TL.
Embaixadór Estadu Unidu Amerika (EUA) iha Timor-Leste, Kevin Blackstone hatete, governu EUA anunsia ona apoiu programa ba tinan-lima nian ho orsamentu tokon US$93, inklui orsamentu ne’ebé atu apoiu dezastre iha Timor-Leste ho montante rihun US$100.
“Governu Estadu Unidu, anunsia ona apoiu programa ba tinan lima nian, ne’ebé sei fó ba Timor-Leste, tanba ne'e, ami-nia James ne’ebé hanesan Diretór USAid iha Timor-Leste, sei ko’alia ho Ministériu relavante sira, atu identifika tipu apoiu ne’ebé sei fó, montante projetu multi anual ne’ebé sei fó ba Timor-Leste, totál tokon US$93 nomós orsamentu ba asisténsia ajuda apoiu dezastre ho montante rihun US$100”, Kevin Blackstone hato'o lia hirak ne'e hafoin sorumutuk ho Prezidente Parlamentu Nasional iha uma fukun, kuarta (07/04).
Apoiu hirak ne’ebé EUA fó, tanba haree mós ba kontribuisaun valor demokrasia, respeitu diretu umanu ne’ebé durante ne'e EUA ho Timor-Leste fó ba malu.
"Tanba saida mak estadu unidu apoiu Timor-Leste, tanba ita-nia valor ne’ebé ita fahe ba malu barak liu, mak hanesan demokrasia, no respeitu ba ditetu umanu”, dehan nia.
Maibé, osan ne’ebé apoiu, sei la fó diretamente ba vítima dezastre naturál sira, no sei fó ba servisu protesaun sivíl nian, mak bele halo servisu responde ba dezastre naturál sira.
"Ami sei anunsia ninia detallu iha tempu hirak tuir mai, ami mós sei servisu hamutuk ekipa protesaun sivíl , parseiru relevante sira seluk”, haktenik nia.
Kona-ba Apoiu ne'e, Embaixadór EUA Kevin Blackstone relata tiha ona ba Prezidente Parlamentu Nasionál liuhusi audensia loron 7 fulan-abril. (*)