Veteranus Austrália Aluga Aviaun Rasik Apoiu TL

Sasan sira ne'ebe apoiu husi Veteranu Australianu sira hatun ona husi Aviaun iha Aeroportu Komoro, Segunda (12/4) Sasan sira ne'ebe apoiu husi Veteranu Australianu sira hatun ona husi Aviaun iha Aeroportu Komoro, Segunda (12/4) Foto Tempo Timor

Tempotimor (Dili)- Veteranus husi Australia ho inisiativa organiza malu aluga rasik aviaun hodi lori sasán mai Timor-Leste (TL) hodi apoiu vitima inundasaun.

"Ho mos apoiu husi Embaixada Timor-Leste iha Australia no husi komunidade Timoroan iha Darwin no belun sira husi Portugal no Australia, aviaun solidariedade organiza husi veteranus Australia to' o ohin iha aeroportu Dili ho aimoruk no ekipamentu esensial sira tau iha kaixa hamutuk 70", Haktuir komunikadu ne'ebé www Tempotimor.com asesu, segunda (12/04).

Tuir planu, Aviaun solidaridade ne'e sei to’o iha Aeroportu Presidente Nicolau Lobato, Dili, maizoumenus 11:45 otl.

Veteranus lubuk ida husi Australia organiza-an ho inisiativa rasik, la'os ho governu Australia nia apoiu, maibé sira mak konsege aluga aviaun husi Darwin ba Dili.

Hafoin simu notisia kona-ba dezastre natural ho udan boot no bee-sae maka' as iha Domingu, 4 Abríl liuba, Veteranus Australia hamriik kedas no bolu atensaun maka' as ba sidadaun australianu hotu- hotu hodi buka apoiu kedas ba povu Timor-Leste.

Koordenador Eis Major Australianu, no Konsul Honorariu iha Queensland, Michael Stone, hatete, sira buka dalan oioin atu bele apoia lalais povu Timor-Leste atu hamenus terus ba sira ne'ebé lakon uma no lakon sasan uma laran no haree mos oinsa prevene hasoru moras barak hafoin inundasaun.

Ho fuan moras tebes mak nia rona katak familia barak lakon mos ema husi uma laran.

Nia hatete la'os nia de'it, maibé veteranu atus ba atus, no sidadaun Australia lubuk ida, sente fuan kanek bainhira rona no haree terus Povu TimorLeste nian iha imajen hatama iha TV no media sosial.

Sira sente triste no todan Povu TimorLeste nian, hanesan familia rasik ida ba sira.

Ho aviaun de'it mak bele hatan lalais. Atu realiza sira nia hakarak ne'e.

Nune'e, veteranu INTERFET ida, Sr Craig Thrupp, na'in ba business Sentinel, oferese aluga aviaun hodi tula kedas sasan ne'ebe esensial no prioritariu liu iha Timor-Leste.

Nune'e mós, komunidade Timor oan iha Darwin, hamutuk ho komunidade Portugueza no Australiana, veteranus Australia no konfisaun relijioza sira fo'o liman ba malu hodi halibur sasan ne'ebe esensial tebes hanesan aimoruk (fó de'it husi farmasia privada sira), vitamina oioin, ekipamentu ba traballador sira iha servisus emerjensia, produtus igiene nian no sasan seluk tan hodi fahe ba komunidade terus hela iha fatin-fatin.

Honorariu Konsul Timor -Leste nian iha Queensland, Michael Stone, ne'ebé akompaña rasik sasan humanitariu ne'ebé hato'o ho aviaun ohin.

"Maluk sira iha Timor-Leste, ami iha li'ur hanoin no sente laran kanek haree ita-boot sira nia terus. Belun boot metin Timor-Leste nian iha Australia sei tenta nafatin husu maka'as apoiu internasionál hodi apoia ba kalamidade públika daruak nee. Ami nia fuan raan suli akompaña dezafiu sira ne'ebé ita boot sira kontinua enfrenta. Barak sei moris hela iha tahu laran. Situasaun hanesan nee sei hamosu moras barak no ami lakoi husik ida nee akontese. Ita boot sira la mesak ida. Ami sei la kole buka dalan seluk atu apoia. Ami hadomi imi. Hela forte, hela seguru. Kuidadu moras korona, moras nee moras seriu duni. Ita sei hakaat dezafiu nee hamutuk", dehan Nia

Ines Almeida, Embaixadora Timor-Leste, rekonese no valoriza esforsu boot tebes husi komunidade timoroan iha Darwin no apresia tebes jestu solidariedade espesial husi belun Australianu no mos husi belun portugues sira iha tempu halerik ida nee.

"Ida nee mak ezemplu boot husi solidariedade australiana ne'ebe hahu husi sira ne'ebe mai funu iha TL, iha guerra mundiál daruak, habelar maka'as tebes iha tempu luta libertasaun nasional, iha tempu INTERFET no haburas too agora. Amizade ida klean no metin ba bei-beik, tanba timoroan sira mos hatene oinsa habelar relasaun umana ho sidadaun no sidada Australianu sira, iha tempu ne'ebe de'it, hahu husi 40 mil ne'ebe mate iha Funu Boot Daruak tanba apoia soldadu australianu sira iha Timor-Leste. La iha buat ida bele hakotu amizade espesial entre solidariedade australiana no Povu Timor-Leste", Nia afirma

Misaun ne'e hetan apoiu husi mos veteranu belun di'ak Membru Parlamentu Luke Gosling no Vince Connelly, Membru Parlamentu Australia, Veteranu INTERFET, Mark Herewini. Sira mos hato'o apoiu masimu solidaridade ho Timor-Leste.

Embaixadora Ines Almeida halo kordenasaun ho Ministériu Negósiu Estranjeiru, Sentru Integradu Jestaun Krisi no mós Prezidente Konsellu Kombatentes Libertasaun Nasional (CCLN). (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« May 2021 »
Mon Tue Wed Thu Fri Sat Sun
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Tempo Timor Networks

Online Counter