Nune'e Bankada Opozisaun iha Parlamentu Nasional husu Konsellu Superior Majistradu Ministériu Púpliku (KSMMP) atu aprezenta kandidatura ne’ebé kualidade hodi lidera PGR.

Deputada CNRT Carmelita Caetano Monis, nia parte seidauk simu informasaun serteza kona-ba kandidatura, maibé husu konselhu superior majistradu tenke rekomenda ema ne’ebé ho klasifikadu primeiru inklui valor di’ak .

PGR dadaun nia mandatu dala rua ba tinan 8, maibé na’in hira ne’ebé mak konsellu superior mazistradu propoin ba presiza iha kualidade.

“Ha’u mós seidauk iha informasaun kandidatura ne'e mai husi ne’ebé, e se mak hato'o, maibé primeiru mak tenke haree antiguidade, senioridade, segundu tenke haree nia klase, no terseiru tenke haree husi nia klasifikasaun, tanba ida ne'e sai nu’udar kritériu ida ne’ebé importante liu”, hatete nia iha parlamentu Nasionál segunda (26/04).

Tanba, iha Estatutu Mazistradu Ministériu Públiku, nia mós hatete sei laiha ema ida mak atu rekomenda kandidatura, maibé sira ne’ebé mai husi Prokuradór Kareira, nomós juiz sira, bele sai nu’udar Prokuradór Jerál.

"Parese prezidente mak husu KSMMP sira-nia hanoin, se bele sira rekomenda ema na’in hira, mak foin PR hili entre sira ne’e”, dehan nia.

José da Costa Ximenes, hetan fiar husi eis Prezidente Repúblika (PR), Taur Matan Ruak, tuir lei haruka no hala’o kna’ar iha instituisaun PGR durante mandatu dala-rua, hahú hosi 2013 to’o 2017 (primeiru mandatu) no kontinua husi tinan 2017 to’o 2021 (segundu mandatu).

PGR nomeia no ezonera husi Prezidente Repúblika, hafoin rona tiha Governu, entre majistradu sira Ministériu Públiku nian no Juis-de-direito sira ne’ebé ho kategória la inferiór husi 1ª klase, ba mandatu tinan-haat, renova, dala ida de’it, ba períodu hanesan.

Dezde loron 15 fulan-abríl tinan 2013, kargu PGR ne’e okupa husi José da Costa Ximenes, ne’ebé iha loron 28 fulan-abríl 2017, simu posse ba ninia mandatu daruak husi Prezidente Repúblika, Taur Matan Ruak. (*)