Apoiu ne’e fó ba inan isin-rua no inan ne’ebé fó susu labarik mak bebé nia ropa nomós nesesidade balun ba inan sira inklui fós.
Diretora Saúde Munisípiu Dili, Agustina Sagurado hatete, sira oferese mós hahán ba labarik sira liuliu sira ne'ebé tinan lima mai kraik no bebé sira.
"Ami fornese hahán ba labarik sira liliu tinan 5 mai kraik no bebé fulan neen, nomós ba inan isin-rua sira no ami oferese mós fós hodi tein ba labarik sira no inan isin-rua”, dehan Agustina iha Tasitolu Maslidun, tersa(27/04).
Entretantu inan isin-rua, Joaninha Claver, kontente tebes hetan apoiu husi SSM no parseiru UNICEF maske oferese sasán oituan maibé sira haksolok tebes ho ida ne'e.
"Sente kontente no agradese tebes ba SSM ho parseiru UNICEF ne’ebé fó apoiu mai ami inan isin-rua ho labarik sira, maske iha hela inundasaun nia laran maibé sira bele mai oferese hahan mai ami no ba ami-nia oan sira”, dehan Joanina Claver.(*)