Tuir Xefe Estadu, aeroporto Rota do Sândalo priense kritériu sira hotu ne’ebé sukat kapasidade aeroporto ida nian ho kualidade di’ak liu kompara ho aeroportu internasional Nicolau Lobato Komoro.
"Kritéria sira mak hanesan loron ida aviau tuun dala hira, servisus apoiu iha terminal sira, inklui servisus alfândega, imigrasaun, karentena no polisia, no pista nia luan no kondisaun seguransa área ne’ebé funsiona durante oras ruanulu resin hat nia laran. Tamba nune’e duni, nia bele akomoda pasajeirus barak liu duke aeroporto Prezidente Nicolau Lobato, iha kapitál Dili. Aeroporto ida ne’e no projetu tomak RAEOA/ZEESM, hanesan temi ona, nu’udar produtu ida husi akordu ne’ebé halo entre líder bo’ot nain rua, Xanana Gusmão no Mari Alkatiri," dehan Lu Olo iha ninia diskursu, Tersa (18/06/2019).
Xefe Estadu ne’e dehan, Timor Leste iha ona aeroportu ida ho kualidade nível internasionál, agora tenke estabelese lalais unidade ida hodi dezenvolve polítika sira ne’ebé relasiona ho avisaun sivil no metas hodi hetan ba RAEOA/ZEESM, inklui kuadru jurídiku no planu ba dezenvolvimentu.
Nia dehan, autoridade RAEOA hatudu ona kapasidade no Prezidente Repúblika hein atu haree planu estratéjiku ida ba negósiu no turizmu hodi viabiliza investimentu ida ne’e ho nia kustu kuaze millaun $120 hodi hetan nia retornu no tau Timor Leste iha nível ida ho rekoñesimentu internasionál.