MJ Haruka Ekipa Tuun Nonook Sukat Rai, Komunidade Aspol Hafodak Featured

Geogle map Dili Geogle map Dili Foto Luta Hamutuk

Temotimor (Dili) Ohin (Kuarta) dader tuku 10 OTL, ekipa husi Diresaun Nasionál Terras no Propriedades, Ministériu Justisa (MJ) tuun ba sukat rai ne'ebé komunida sira hela ba iha Bairro Aspol, Suku Vila Verde, Dili.

Prezensa husi ekipa ne'e halo komunidade sira hakfodak tanba molok tuun laiha informasaun ba komunidade ne'ebé okupa rai ne'ebé lokaliza iha Edifisiu Ministériu Solidaridade Sosial no Inkluzaun nia kotuk ne'e.

Komunidade ida ne'ebé hela iha bairro ne'e, António Gusmão Soares deklara triste tanba molok ekipa husi MJ tuun mai sukat rai la fó informasaun ba sira.

Maske rai ne'e estadu nian, maibé António dehan, governu presiza halo komunikasaun ho komunidade, liu husi autoridade lokal sira molok halo asaun ruma.

“Ami haree ba sira hanesan sira mai tuir sira-nia hakarak de'it, la respeita ami komunidade sira, ida ne'e mak ami triste oituan”, dehan nia iha nia hela fatin, Kuarta (19/06/2019).

Aleinde sukat rai, ekipa ne'e mós foti dadus komunidade sira ne'ebé hela iha fatin refere. Maibé, tuir António importante mak halo dialogu atu komunidade mós hatene sira sai oinsa no atu ba hela iha ne'ebé.

“Agora sira mai hola ami-nia dadaus hanesan ne'e, se karik hasai ami ne'e atu ba hela iha ne'ebé?, depois hasai ami, ami nia oan sira eskola ne'e sira bele kria kondisaun ka sira husik de'it par moris nafatin iha dalan ninin ne'e?. Tanba ita-nia estadu dehan katak ita-nia oan no alin sira tenke ba eskola."

Komunidade sira hato'o ona informasaun ba autoridade Suku nian no autoridade lokal mós deklara la simi informasaun kona-ba sukat rai.

Tuir informasaun komunidade neebé hela iha bairro aspol suku vila-verde total uma kain kuaze 70 resin ho total ema na'in 100 resin.

Iha fatin hanesan Xefe Departementu Terras Propriedades Florindo José da Costa dehan, ekipa téknika tuun foti dadaus no sukat fatin ne'ebé komunidade sira hela ba tanba hetan karta autorizasaun husi Ministériu Justisa bazeia ba pedidu husi Institutu Petroleu no Jeolójia (IPG).

“Ita hetan pedidu ida husi Institutu Petróleum no Jeolójia hato'o mai Ministériu Justisa, entaun Diresaun Nasionál Terras Propriedades apoiu levantamentu tékniku ba iha fatin ne'e, liu-liu tanba IPG atu harii edifísiu foun iha fatin ida ne'e”, dehan Florindo.

Nia parte dehan ekipa téknika tuun foti dadus no sukat komunidade nia hela fatin tanba serbisu hamutuk ho autoridade lokál iha Kaikoli hamutuk ho Ministériu Obras Públikas inklui IPG.

Relasiona ho durasaun ba komunidade atu hamamuk fatin refere, Xefe Departementu ne'e dehan, seidauk klaru tanba foin mak faze indentifikasaun no foti dadus.

“Ita seidauk koalia kona-ba sai nian tanba ne'e foin faze primeiru, identifikasaun. Entaun iha identifikasaun ne'e kuandu la'o hotu ona mak ita hoin oinsa mak planu ba levantamentu dadus.”

Nia hatutan, rai ne'ebé komunidade sira okupa ne'e propriedade estadu nian, tan ne'e komunidade ne'e atu koloka ba iha ne'ebé ne'e desizaun governu nian.

Rate this item
(3 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Anunsiu

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com